८९ दँ दुम्ह म्येहालामि गुह्येश्वरीया दाफा म्ये सार्वजनिक


वाङमय शताब्दी पुरुष संस्कृतिविद् सत्यमोहन जोशीं देशय् कला व कलाकःमिया नामय् प्रज्ञा प्रतिष्ठान दयेकूसां उगु प्रतिष्ठानं वाद्यवादक, गुरु व कलाकःमितयेत म्हमस्यूगु धयादीगु दु । शताब्दी पुरुष जोशीं देयया अमूर्त सम्पदाया रुपय् दयाच्वंगु परम्परागत म्ये, संगीतया संरक्षणय् जनस्तरं तःधंगु योगदान दयाच्वंसां राज्यं माःकथं छुं यायेमफूगु धासें कुंखिनादिल । 


ज्याझ्वलय् शताब्दी पुरुष जोशी, जनकवि दुर्गालाल, वौद्ध विद्वान फणिन्द्र रत्न, चर्या गुरु यज्ञमान पतिलिसें दाफा गुरुपिन्त दोसल्लां न्ययेकाः सम्मान याःगु खः । नुगः खँ तयेगु झ्वलय् जनकवि दुर्गालाल, वौद्ध विद्वान फणिन्द्र रत्न, चर्या गुरु यज्ञमान पतिलिसें प्रा. डा. सिलु मानन्धर बज्राचार्य व प्रा. डा. पुष्कर बज्राचार्यं नेवाः समाजय् परम्परागत दाफा म्येया महत्व व थुकिया संरक्षणय् म्येहालामि मानन्धरया योगदानया बारे चर्चा यानादीगु खः ।


शनिबाः जूगु ज्याझ्वलय् ८९ दँ दुम्ह म्येहालामि गुह्येश्वरी राज मानन्धरं हालादीगु परम्परागत दाफा म्येत सार्वजनिक याःगु खः । शताब्दी पुरुष जोशीयालिसें जनकवि दुर्गालाल श्रेष्ठ, वौद्ध विद्वान फणिन्द्र रत्न बज्राचार्य, चर्या गुरु यज्ञमान पति बज्राचार्यं मंकाः रुपमा मानन्धरं हालादीगु दाफा म्येया भच्र्युंअल एल्बमया विमोचन यानादिल । मानन्धरं हालादीगु ७पु दाफा म्येत सार्वजनिक याःगु खः । दक्वं म्येय् संगीतकःमि हरिशरण सायमिं संगीत संयोजन यानादीगु दु । सार्वजनिक जूगु दक्वं म्येत मानन्धरया हे युट्युब च्यानलमार्फत सार्वजनिक जूगु दु । 

ज्याझ्वलय् मानन्धरया म्ये ‘श्याम सुन्दर’ या म्यूजिक भिडियो नं सार्वजनिक याःगु खः । म्येय् स्वजन रघुवंशी व काेरीयाेग्राफर नापं कलाकार आराध्यलक्ष्मी खड्गीया नृत्य स्वयेफइ ।


Share on Google Plus

News: Newa News

    छ्याता
    फेसबुक छ्याता