गुथि विधेयकया निर्णय १० गते । बहुमत दःसा जक लित काइ ।


प्रधानमन्त्री केपी शर्मा ओली र भूमि व्यवस्थामन्त्री पद्मा अर्यालं गुथि विधेयक २०७५ लित कयागु घोषणा यायेधुंका राष्ट्रियसभां १० गते विधेयक लित कायेगु तयारी याःगु दु । वंगु मंगलबाः विधेयक लित कयागु घोषणा याःगु सरकारं स्वन्हु लिपा जक पौ छ्वःगु खः । भूमि व्यवस्था मन्त्रालयं वंगु शुक्रबाः विधेयक लितकायेगु औपचारिक पौ राष्ट्रियसभाय् छ्वयेधुंका राष्ट्रियसभां १० गते प्रक्रिया न्ह्यःने यंकीगु जूगु खः । राष्ट्रियसभा मुँज्या १० गतेया नितिं सःतातःगु कारणं उगु दिं न्ह्यः विधेयक लित काय् मज्यूगु खः ।

राष्ट्रियसभाय् दर्ता जूगु विधेयकयात भूमि व्यवस्थामन्त्री अर्यालं संसदं विधेयक लित कायेगु प्रस्ताव याःसेंलि उकियात सदनय् बहुमतं स्वीकृत यायेमाः। उकिया नितिं भूमि सुधार मन्त्रालयं संसद सचिवालयस विधेयक लितकायेमाःगु कारण नापं संसद सचिवालययात पौ छ्वयेमाः । उगु लितः कायेगु प्रस्तावयात संसदया मुँज्याय् न्ह्यब्वइ । प्रस्तावयात बैठकय् भूमि व्यवस्थामन्त्रीं न्ह्यब्वयेधुंका निर्णयार्थ तइ ।

गुथि विधेयक २०७५ य् राष्ट्रियसभाय् थ्व न्ह्यः सैद्धान्तिक सहलह जुया संशोधनया प्रक्रिया क्वचाःगु खः । तर विधेयकया विरोध जूगु कारणं विधेयकया प्रक्रिया न्ह्यःने वने मफुत ।

Share on Google Plus

News: Anonymous

    छ्याता
    फेसबुक छ्याता

0 Comments:

Post a Comment