आः खादा हे निषेध, वडाध्यक्षतय् हे विरोध


यल —आ वाग्मती गाउँपालिकाया छु नं ज्याझ्वलय् प्रधानमन्त्री वा सरकारया उच्च पदस्थ मनु हे वःसां खादा क्वखाय्कि मखुत । गाउँपालिकां खादा, ब्याचनापंया हलंज्वलं छ्यले मदइगु निर्णय याःगु दु ।
गाउँपालिकाया निर्णयया धासा प्यखेरं विरोध जूगु दु । स्थानीयतयेसं बौद्ध धर्मया आस्थाय् छ्यलीगु वस्तु निषेध मज्यूगु सः तयाच्वंगु दु ।

खादा निषेध यायेगु निर्णयप्रति ग्याबा तामाङ उत्थान संघं ध्यानाकर्षण जूगु धाःगु दु । वाग्मती गाउँपालिका ७ गिम्दीया वडाध्यक्ष नवराज सञ्जेलं सहलह हे मयाःसे निर्णय याःगुलिं आपत्ति प्वंकुगु दु । गिम्दी व वडा २ माल्टाय् धासा निषेध यासां खादाया छ्यलाबुला जुल । वडाध्यक्ष सञ्जेलं जातजातिया आस्थानाप म्हितुगु द्वपं तयादिल । निर्णय मभिंकुतले बिरोध यायेगु वयेकलं न्ह्यथनादिल । खादाय् अष्टमंगलया चिं बौद्ध, हिन्दु व जैन फुक्कसिया मंका जूगु न्ह्यथनादिल ।

थुखे वाग्मती गाउँपालिका अध्यक्ष वीरबहादुर लोप्चनं माक्व सहलह याना फुक्कसिया सहमतिइ हे निर्णय यानागु दाबी यानादिल ।

‘थ्व निर्णय छु नं जातजाति, धर्म संस्कृति वा भाषाभाषीया भावनाय् लुफिं हाकेत मखु,’ वयेकलं थुइकादिल, ‘गाउँपालिका व वडा ज्याकुथिं ग्वसाः ग्वइगु ज्याझ्वलय् जक मितव्ययी प्रभावकारी व ई प्रभावित जुइगु खनेदया निर्णय यानागु खः ।’ वयेकलं मेगु संघसंस्थां ग्वसाग्वइगु ज्याझ्वलय् छ्यःसां मपाइगु न्ह्इथनादिल । ‘निर्णयया मखुगु टिप्पणी जुल,’ वयेकलं न्ह्यथनदिल, ‘मेपिनिगु लिउने मवंसे गाउँपालिकाया कार्यसम्पदनय् ग्वाहाली यानादीत इनाप यानाच्वना । ’

Share on Google Plus

News: Newa News

    छ्याता
    फेसबुक छ्याता