येँया दुनेया बस्ति ओमबहालय् नं कोरोना संक्रमण, स्वनिगलय् ‘लोकल ट्रान्समिसन’ जुल


येँया दुनेया बस्ति वा भित्री शहर कथं कयातःगु येँ मनपा २३ वडाया ओमबहालय् तकं कोरोना संक्रमण खनेदत । वडाध्यक्ष मचाराजा महर्जनया कथं यकिन नक्सां थ्व हे मनु, थन च्वनिम्ह धका सीकेमफुनि । टेकु अस्पतालं कन्हे आइतबाः रिपोर्ट बीगु वयेकलं न्ह्यथनादिल । थ्व नापं ठमेलय् तकं संक्रमित खनेदय् धुंकुगु दु ।

स्वनिगःया गोकर्णेश्वर, जोरपाटी, नयाँ बानेश्वर, नख्खिपोट, धापासी, बालाजु, बालुवाटार, जोरपाटी, प्युटार, कपन, भैंसेपाटी, चाँगुनारायण, बुढानिककण्ठ, टेकु, नारायणहिटी, नख्खु, साँखु, थापागाउँ, सुकेधारा, चन्द्रागिरी, खुशिबु, टीकाथली, व्यासी, सोह्रखुट्टे, कमलविनायक, टोखा, सिनामंगल, लुभु, हात्तीवन, थसिखेल, चापागाँ संक्रमित खनेदूगु थाय् खः । ईडीसीडीया कथं आःतक स्वनिगःया ३० गु स्वयाँ अप्वः थासय् संक्रमितत लूगु दु ।

इपिडिमियोलोजी तथा रोग नियन्त्रण महाशाखाका (ईडीसीडी)या कथं असार १८ गतेतक स्वनिगलय् १८४ म्ह संक्रमित पुष्टि जूगु दु । लिपांगु प्यन्हु दुने हे ७४ म्ह पुष्टि जूगु खः । थीथी देसं चार्टर फ्लाइटं वःपिं, स्वनिगः पिनं उपचारया नितिं वःपिं थुकि दुथ्याः ।

अथेहे यलय् छम्ह मचा मेडिसिटी अस्पतालय् ब्रेन ट्युमरया शल्यक्रिया यायेन्ह्यः पीसीआर टेष्ट याना स्वःगु इलय् कोभिड १९ पुष्टि जुल । ट्राभल हिस्टी मदुगु व संक्रमितया सम्पर्कय् मवःम्ह उम्ह मचायात गुकथं संक्रमण जुल धैगु मालेज्या जुयाच्वंगु दु ।

असार १६ गते स्वनिगलय् खनेदूपिं १६ म्ह संक्रमितय् ९ म्ह विदेशं वःपिं खःसा ५ म्ह स्वनिगःयापिं हे खः । छम्ह शंखमूलया प्वाथय् दुम्ह मिसा खःसा वयेकःया ट्राभल हिस्ट्री मदु ।

भक्तपुर क्यान्सर अस्पतालया कर्मचारी, टोखा च्वनिम्ह सशस्त्र प्रहरी जवान, रसियन दूताबासया सुरक्षाय् खतेजुम्ह जनपथ प्रहरीयाके नं संक्रमण जूगु दुसा स्रोत सीके मफुनि ।

१७ गते स्वनिगलय् १७ म्ह संक्रमित लुल । उकि ६ म्ह विदेशं लिहाँवःपिं खः । ३ म्ह वयोधा अस्पताल व निम्ह अल्का अस्पतालया कर्मचारी खः । मेपिं न्याम्ह यलया चापागाउँ, हात्तीवन, थसिखेल, नख्खिपोट व ख्वपया गठ्ठाघरयापिं खः । इमि नं ट्राभल हिस्ट्री खनेमदु ।

स्थानिय संक्रमण जुइधुंकुग संकेत थुकिं क्यनाच्वंंगु दुसा थ्व गुलि गम्भिर खः धैगु आःतक नं सरकारं वाःचायेकुगु मदुनि ।

Share on Google Plus

News: Newa News

    छ्याता
    फेसबुक छ्याता