नेपाल संवतया न्हूदँ समारोह १२ गते हे, १३ गते किजापुजा अशुभ


कार्तिक ३ गते आइतबार, व हे इलय् निथाय् निगु कथंया ज्याझ्वः जुल । हलिं नेवाः गुथिया ग्वसालय् तिथिमितिइ जुयाच्वंगु अन्यौलयात कयाः सहलह जुलसा येंया न्हूदँ समारोह समितिया पत्रकार सम्मेलन नं मेगु थासय् व हे इलय् न्ह्यात । निगुलिं ज्याझ्वलय् न्हूदँ समारोह कथं कात्तिक १२ गते हे यायेगु क्वजित ।
थुखे येंया नेपाल संवत न्हूदँ राष्ट्रिय समारोह समिति ११४०या ज्याझ्वलय् ११, १२ व १३ गते यात लक्ष्मी पुजा, म्ह पुजा व किजापुजा कथं नालेगु घोषणा यानाच्वंगु इलय् उखे यल व ख्वपया जोतिश विज्ञतयेसं धासा शास्त्र कथं १३ गते किजापुजा यायेगु धन नाश व शरीर नाश नापं अशुभ जूइगु उल्लेख यानाच्वंगु खः । ख्वप व यलया न्हूदँ समारोह समितिं तकं १०, ११ व १२ गते यायेगु खँ न्ह्यथनाच्वंगु इलय् यलया हिरा व्यवसायी रमेश महर्जन नायः दूगु येंया न्हूदँ समारोह समितिं ११, १२ व १३ गते यायेमाःगु वकालत यानाच्वंगु खः ।

हलिं नेवाः गुथिया ग्वसालय् कालिमातीइ जूगु सहलह मूज्याय् पञ्चांग निर्णायक संघया प्रतिनिधि दैवज्ञ किर्तिमदन जोशी, ख्वपया तलेजु पुजारी दैवज्ञ कृष्ण राज जोशी, यल न्हूदँ समारोह समितिया कजि नापं बौद्ध विहार संघया महासचिव सुरेन्द्र बज्राचार्य, दैवज्ञ ज्योतिश केशरगोविन्द जोशीया मंका सलय् १० गते हे लक्ष्मी पुजा यायेमाःगु व छसीकथं ११ गते म्हपुजा व १२ गते किजापुजा जुइगु धासें पञ्चांग निर्णायक संघया पात्रोयात विवादय् हयेम्वाःगु खँ न्ह्यथंगु दु ।

मंका वक्तव्य पिकासें ग्रन्थ व शास्त्रया आधार नापं १०, ११ व १२ शुभ जूगु व न्हापा नं थुकथं जुइधुंकुगु दसु तकं वयेकपिंसं वियादिल । अनाधिकृत संस्थाया ग्वसालय् गन्यमान्य व्यक्तिपिंत भ्रमय् तया बिना आधार ११, १२ व १३ गते जुइमाःगु प्रचार याःगु वयेकः पिनि द्वपं दु । वंगु ञलागा नवमी (असोज ६) कुन्हु नेपालभाषा मंका खलःया ग्वसालय् ११, १२ व १३ गते स्वन्ति नखः हनेगु निर्णय जूगु खःसा, वयाँ निन्हु लिपा नेपालभाषा मंका खलःया नायः दुर्गालाल श्रेष्ठं खलःया नामय् सुं सुं मनुखँ मंका खलःया नां तया ज्याझ्वः याना भ्रम सृजना यायेत स्वःगु द्वपं नापं भ्रमय् मलायेत इनाप नापं मेगु वक्तव्य पितब्यूगु खः ।

दैवज्ञ किर्तिमदन जोशीं पात्रो देकेत ताःईतक ह्यूपा यायेमाःसा आधार ज्वना वयेत आव्हान याःसां सुं मवःगु व आः स्वन्तिया न्ह्यःने विवाद यायेमाःगुया आवश्यकता मदुगु न्ह्यथनादिल । थौंतक नं पञ्चांग निर्णायक समितिइ आधिकारिक सुचं तकं मवःगु वयेकलं न्ह्यथनादिल । आधिकारिक पात्रोय् १०, ११ व १२ हे दुगु व अनाधिकृत रुपं सुनां पात्रो पिकाःगु जूसा वयात कारवाही यायेगु तकं वयेकलं न्ह्यथनादिल । अझनं सुयां ११, १२ व १३ यायेमागु प्रष्ट आधार, तथ्य ज्वना वःसा उकि बिचाः याये फइगु जूगुलिं गलत प्रचार स्वयां समितिइ वयेत आव्हान तकं यानादिल । जोशीया कथं १० गते बहनी मू नखः लक्ष्मी पुजा जुगुलिं न्हिछि हे औशी कासां ज्यू । छगु हे तिथिइ निगु नखः लाःसा तधंगु नखःया आधार कायेमाःगु वयेकलं न्ह्यथनादिल । सुखरात्री कथं औशी काइगु जूगुलिं पिखालुगु सुथः काये ज्यूगु व सुथः हे खिचा पुजा यासां मपाइगु वयेकलं न्ह्यथनादिल ।
धार्मिक व शास्त्रीय प्रमाण दूगु लक्ष्मीपुजाया विषयलय् ख्वपया तलेजु भवाणी नाप स्वापु दुगु ६७९ संवतया थ्यासफुतिइ तिथि छन्हु लासां लक्ष्मी पुजायात आधार कायेमागु उल्लेख यानातःगु दु । न्हिछि चतुर्दशी क्यना बहनी आमाइ क्यंसा बहनी लक्ष्मीपुजा यायेमाःगु कृत्य चिन्तामणिइ उल्लेख दूगु वयेकलं न्ह्यथनादिल । अथेहे म्हपुजा पारुया बहनी हे यायेमाःगु ग्रन्थय् उल्लेख यानातःगु तकं वयेकलं न्ह्यथनादिल । न्हूगु दँ नेपाल संवत कथं प्रतिपदा वा पारु क्यनकि जुइगु जुगुलिं ११ गते सुथः ९ः३३ य् हे न्हूदँ क्यनि । उत्सबया ज्या जुगुलिं व कुन्हु हे न्हूदँ समारोह हनेज्यूगु वयेकया धापु दु । तथापि न्हूदँ समारोह १२ गते यायेगु जानकारी न्हूदँ समारोह समितिं पितब्यूगु खः ।

ख्वपया तलेजु पुजारी दैवज्ञ कृष्ण राज जोशीं स्वन्ति नखः तान्त्रिक विधिलिसे स्वापु दुगुलिं तिथि उखे थुखे याये मज्यूगु न्ह्यथनादिल । ख्वपय् १०, ११ व १२ गते हे छसियंकं हनेत्यंगु व थुकिं छुं अस्पष्टता मदुगु वयेकलं कुलादिल ।

यल बौद्ध बिहारया महासचिव सुरेन्द्र बज्राचार्यया कथं थःपिंसं न्हापा हे यलया थीथी खलः पुचः नाप जाना १०, ११ व १२ गते हे स्वन्ति न्यायेकेगु निर्णय यानागु व सामाजिक सञ्जालय् व हे विवरण हूबहु तया मिति जक हिला ११, १२ व १३ याना भ्रम तयेत छथ्व मनुत जुयाच्वंगु धासें खण्डन तकं यानादिल । हानं अज्यागु दुष्प्रचार यायेत स्वःसा कानुनी उपचार मालेगु तकं वयेकलं न्ह्यथनादिल ।

११, १२ व १३ यायेगु येंया थीथी खलया निर्णय विज्ञ नाप जाना निर्णय याःगु खःला ? धका तकं न्ह्यसः ब्वलंगु खः । अथेहे आधिकारिक तथ्य नापं शास्त्रया आधार कया वयेत चुनौति तकं उपस्थित ज्योतिश तयेसं ब्यूगु खः ।

हलिं नेवाः गुथि नायः जुजुमान श्रेष्ठया नायसुइ न्ह्याःगु ज्याझ्वलय् गुथिया संरक्षक शान्त प्रकाश श्रेष्ठ विशेष पाहाँ कथं झाःगु खःसा जोतिश विज्ञ नापं गुथिया दुजःपिनिगु उपस्थिति दुगु खः ।

विवाद ज्यंकेत यें या प्रतिनिधि कथं जनबहालया गुरुजुपिंत ब्वंगु खःसां नं वयेकपिं उपस्थित मजूगुलिं येंया आधिकारिक धारणा मवःगु खः । ज्याझ्वः श्रीकृष्ण महर्जनं न्ह्याकादीगु खः ।

पितब्यूगु वक्तव्य :



Share on Google Plus

News: Newa News

    छ्याता
    फेसबुक छ्याता