नेवाः एकता अभियानया ग्वसालय् ग्लोबल नेपाल नेटवर्क व नेवाः एचडि टिभि नेपालभाषा मचा चिनाखँ धेधेबल्ला कासाया सिरपा घोषणा थौं सोमबाः नेपाः व्याक्वेटय् न्हिनसिया १ ता इलय् जुइत्यंगु दु ।
जनकवि दुलाल श्रेष्ठया मूपाहाँसुइ जुइत्यंगु सिरपा घोषणा ज्याझ्वलय् न्हापायात नीद्व, ल्यूयात झिंन्याद्व व लियांल्यूयात झिद्व लःल्हायेत्यंगु दु । अथेहे फेसबुक व यूट्यूबय् दकलय् अप्व ययेकूगु चिनाखँ वाचनयात झिद्व तका दां बीगु नेवाः एकता अभियानया कजि कुमुद श्रेष्ठं न्ह्यथनादिल । मुक्कं ७२ ब्वतिकामि दुगु कासाय् निर्णायक कथं भुषणप्रसाद श्रेष्ठ च्वनादीगु व सामाजिक सञ्जालय् दकलय् अप्व भ्यू ल्या हःपिंत सिरपा देछाय्त्यंगु धेधेबल्ला कासा कजि प्रज्वल शाक्यं न्ह्यथनादिल ।
ग्लोबल नेपाल नेटवर्कया अभियान नेवाः एकता अभियान पाखें मस्त नाप थः मां बाः पिंसं नेपालभाषां खल्हाबल्हा यायेगु ह्वःता बी कथं थुगु धेधेबल्ला यानागु नेटवर्कया कजि सुनिल कुमार शाक्यं न्ह्यथनादीगु दु ।
छ्याता
फेसबुक छ्याता