बाखँ न्यने वा या "न्यकू बाजं र गुंला" सफू मेयर शाक्यं पितब्वल


गुंला पर्व व न्यकु पुइगु परम्परायात कःघाना दुथ्याःगु बाखँ सफू "न्यकू बाजं र गुंला" पितब्वज्या जूगु दु । सफू बाखं न्यने वा संस्थापाखें पितब्यूगु खःसा येँ महानगरपालिकाया मेयर विद्या सुन्दर शाक्यं उलेज्या यानादीगु खः।



शनिवाः येँया मरू पिंगननी सफू पितब्वःज्या ज्याझ्वलय् मू पाँहा कथं झाम्ह मेयर शाक्यं सफूया पितव्वज्या यानादिगु ख । ज्याझ्वलय् मेयर शाक्यं थः मचाबलय् बाखँ न्यं वनागु व आः अज्यागु परम्परा तनावंगु धाःसें उगु परम्परायात म्वाकेमाःगु न्ह्यथनादिल । मनु नापं बाखँ तना वनी, अनुभव तनावनी व हे जूगुलिं थःम्हं नं थुकथं बाखँ व अनुभव ल्यंकेत थीथी व्यक्तित्वया खँ संकलन याना मुंकागु व बाखँ न्यने वा पुचलं उकथं हे बाखँ मुंकेगु ज्या याना नेवाः सँस्कृति संरक्षणय् तिबः बीगु कुतः याःगुलिं थुकियात निरन्तरता ब्यूसा महानगरं ग्वाहालि यायेगु न्ह्यथनादिल । वयेकलं थःम्हं ग्वाहालि यानागु तर नेवाःतयेत ग्वाहालि ब्यूसां काः मवंगु न्ह्यथनादिल । ज्याझ्वलय् येँ महानगरपालिकां मस्तयेत स्थानिय सँस्कृति सीकेत ब्वनेकुथिइ थुकथं हे पाठ्यक्रम तयागु तकं लुमंकादिल ।


ज्याझ्वलय् विशेष पाहाँ बागमती प्रदेश सांसद राजेश शाक्यं सफूया प्रशंसा यानादिलसा पाहाँ कथं झाम्ह वडा नं २० या अध्यक्ष  राजेन्द्र मानन्धरं सफूया मगाः मचा कुलादिल । 

पाहाँपिंसं मंका कथं सफू पितबियादीगु खःसा शिक्षाविद नापं संस्कृतविद डा चुन्दा बज्राचार्यं सफूया समिक्षा यानादीगु खः । वयेकलं सफूपाखें मस्तयेसं यक्व सयेके सीके फइगु व न्हूगु प्रयाेग जूगु न्ह्यथनादिल । नेपालभाषा एमए तगिमय् ब्वनेमाःगु न्यकु बाजँ थःम्हँ हे ब्वंकागु विषयया बाखँ सफू पिहाँवःगु व थःम्हँ समिक्षा यायेखंगु धाःसें लसता प्वंकादिल । ज्याझ्वलय् वयेकलं सफूया महत्वया बारे खँ कनादीसें मेगु संस्करणया नितिं दुथ्याकेमाःगु छ्याता तकं बियादिल । 



बाखँ न्यने वाया नायः अश्वेनवीर सिं ताम्राकारया सभानायःसुइ न्ह्याःगु ज्याझ्वलय् सफूया बाखँ कनामि ताम्राकार गुँला बाजँया बाजँ गुरु स्वतन्त्र बहादुर ताम्राकारं थःगु नुगः खँ कनादिल नापं बाखँया बारे न्ह्यथनादिल ।


ज्याझ्वलय् बाखँ न्यने वा या न्वकु एलिना ताम्राकारं लसकुस यासें बाखँ न्यने वा संस्थाया बारे कनादीगु खःसा सभानायः ताम्राकारपाखें सुभाय् देछानादीगु खः ।


दुजः प्रज्वल शाक्यं न्ह्याकादीगु ज्याझ्वलय् दुजःपिं श्रृष्टिना श्रेष्ठ, विनिता मगैया व राज महर्जनं सफूया बाखँ वाचन यानादीगु खःसा छ्याञ्जे रीजा जाेशी, दाँभरी राजिव बज्राचार्य व दुजः शैलेश राजभण्डारीं ग्वाहालि यानादीगु खः । 


बाखं न्यने वा संस्था सँस्कृति प्रेमी ल्याम्ह ल्यासेपिनिगु बाखँ न्यंकेगु परम्परा म्वाकेगु कुतः कथं न्ह्याःगु खःसा थुकि दुथ्याःपिं दक्व हे आर्किटेक्ट, इन्जिनियर व सँस्कृति ल्यंकेत पला न्ह्याकाच्वनादीपि खः । थूगु संस्थां स्वनिगः नापं थीथी थासय् वनाः बाखं न्यकेगु ज्याझ्वः यानावयाःच्वंगु दु। बाखँ न्यने वा या न्हापांगु बाखंयात हे सफू कथं पितब्यूगु खः । थूगु न्यकू बाजं र  गुंला सफू नेपाली खस भासं नापं नेपाल प्रचलित लिपिइ नेपालभाषं दुथ्याकातःगु दु ।






Share on Google Plus

News: Anonymous

    छ्याता
    फेसबुक छ्याता

0 Comments:

Post a Comment