नेपाली कांग्रेसया १४ क्वःगु महाधिवेशन अन्तर्गत थाैं शुक्रबाः निसें वडा अधिवेशन न्ह्याःगु दु । महाधिवेशनया कार्यतालिका कथं १८ भदौलय् देन्यंकंया फुक्क वडाय् अधिवेशन यायेगु धाःसां थाैं ४५ गु जिल्लाय् जक अधिवेशन जुइगु निर्वाचन समितिं न्ह्यथंगु दु ।
५६ जिल्लाया क्रियाशील सदस्यता विवरण सार्वजनिक याःसां अझ २१ गु जिल्लाया सदस्यता क्वछीमफुनि । उकें दक्व जिल्लाय् वडा अधिवेशन शुक्रबाः न्ह्याय् मफूगु खः । कांग्रेसं ल्यं दूगु जिल्लाया वडाय् २६ भदौ न्ह्यः अधिवेशन क्वचायेकेगु धाःगु दु ।
२७ भदौलय् गाउँनगर अधिवेशन जुइत्यंगु दु । वडा अधिवेशनय् क्रियाशील दुजः मतदाता दइगु कथं कांग्रेस विधानया व्यवस्था दु । वडा अधिवेशनं वडा कमिटी चयन यायेगु नापं क्षेत्रीय प्रतिनिधि निर्वाचित जुइ । दकलय् अप्व मत हःपिं निर्वाचित जुइ । कांग्रेसया संशोधित विधान कथं क्षेत्रीय प्रतिनिधिं पालिकाया नेतृत्व चयन याइसा निर्वाचन क्षेत्र (प्रदेश व प्रतिनिधिसभा) कमिटी चयनया लागि मतदाता जुइ । केन्द्रीय महाधिवेशनया लागि मतदाता जूपिं महाधिवेशन प्रतिनिधिया चयन नं क्षेत्रीय प्रतिनिधिपाखें जुइगु जुगुलिं कांग्रेसय् वडा अधिवेशनयात यक्व महत्व बियातःगु दु । विधान कथं २०७६ फागुनय् जुइमाःगु कांग्रेसया महाधिवेशन न्यादँ ६ लाय् सुरु जुइत्यंगु खः । कांग्रेसया केन्द्रीय महाधिवेशन मंसिर ९ निसें १३ तक येँय् जुइत्यंगु दु ।
छ्याता
फेसबुक छ्याता