अपराध न्यूनीकरणय् ध्यान बीत बागमती प्रदेश प्रहरी प्रमुखयात मन्त्री शाक्यया उजँ


नैतिक शिक्षा व नागरिक चेतना अभिवृद्धि जुइगु शिक्षा ब्वनेकुथि निसें ब्वंकेमाःगु व नैतिक आचरण भिंसा जक समाजय् अपराध, विकृतिजन्य व्यवहार म्हो जुयावनिगु बागमती प्रदेशया आन्तरिक मामिला व कानून मन्त्री अजयक्रान्ति शाक्यं न्ह्यथनादीगु दु । मन्त्री शाक्यं स्रोत साधनया पर्याप्तता मजूसां दूगु स्रोत साधन छ्यला अपराध न्यूनीकरण यायेत, दूर्घटना न्यूनीकरण यायेत व कानुन कार्यान्वयन यायेत बागमती प्रदेश प्रहरीयात उजँ बियादीगु दु । 

बागमती प्रदेश प्रहरी ज्याकु हेटौंडां २०७८ तकया वस्तुस्थिति प्रतिवेदन न्ह्यब्वयेगु झ्वलय् वयेकलं थुकथं उजँ बियादीगु खः । बागमती प्रदेश प्रहरी प्रमुख प्रहरी नायब महानिरीक्षक डिआइजी प्रकाशजंग कार्कीया नेतृत्वय् बागमती प्रदेशया एसपी नवराज अधिकारी व मेम्ह एसपी ईश्वर थापां मन्त्री शाक्ययात उगु प्रतिवेदन न्ह्यब्वःगु खः ।

प्रतिवेदन लःल्हाना काःसें मन्त्री शाक्यं भौतिक संरचनां सुसज्जित जुइवं अपराध म्हो मजुइगु धासें अपराध मनुया मानसिकता, मनुया व्यवहार व वातावरणय् निर्भर जुइगु न्ह्यथनादिल । मन्त्री शाक्यं आन्तरिक ममिला मन्त्रालयं वैगु दिनये बजेट देकिबलय् प्रदेश प्रहरीनाप समन्वय यायेगु प्रतिवद्धता व्यक्त यासें अपराध न्यूनीकरण यायेत व आदर्श समाज देकेत प्रदेश प्रहरीयात माःकथंया ग्वाहालि यायेगु न्ह्यथनादिल ।

डिआइजी कार्कीं अपराध रोकथाम व नियन्त्रणया नितिं जनचेतनामूलक ज्याझ्वः यायेत स्रोत परिचालनया व्यवस्था यायेमाःगु, अत्याधुनिक डिजिटल चेकपोइन्ट देकेमाःगु, प्राकृतिक स्रोत–साधनया अवैध दोहन पनेत सरोकारवालानाप समन्वय याना नियन्त्रण यायेगु खँय् मन्त्रालयया ग्वाहालि माःगु न्ह्यथनादिल । वयेकलं स्वनिगःया स्वंगु जिल्ला येँ, यल व ख्वप बाहेक ल्यँ दूगु १० गु जिल्ला थःगु कार्यक्षेत्र जूगु धासें बागमती प्रदेश प्रहरीया झिगु जिल्लाय् पूर्वाधार विकास विस्तार यानाच्वनागु न्ह्यथनादिल ।


Share on Google Plus

News: Newa News

    छ्याता
    फेसबुक छ्याता