सापारु नापंया पर्वया भिडभाड मयाःसे विधि पुवंकेत महानगरया इनाप


येँ महानगरपालिकानापं स्वनिगलय् कोरोना संक्रमण अप्व खनेदयाच्वंगु दु । व जुया मेयर विद्यासुन्दर शाक्यं सतर्कता अप्वयेकेत अपिल याःगु दु । लकडाउन मदयेवं स्वनिगलय् पिनं वःपिनि ल्याः अप्वया जोखिम अप्वःगु मेयर शाक्यं न्ह्यथनादिल । थज्याःगु इलय् सतर्क जुइगुया मेगु विकल्प मदुगु वयेकलं कनादिल ।

शाक्यं गृह प्रशासनं असुरक्षित रुपं स्वनिगः प्रवेश याःपिंत नियन्त्रण मयाःगु द्वपं ब्यूसें स्वनिगःया अवस्था भयावह जुइफुगु चिन्ता व्यक्त यानादिल । कोरोना संक्रमण अप्वयेके मबीत छेँ थुवा व सर्वसाधारण तकं सचेत जुइमाःगु वयेकलं बः बियादिल ।

संघीय सरकारं स्वनिगः दुहाँ वय् धुंका पीसीआर यायेगु व उपचार यायेगु स्वयाँ प्रवेश विन्दुं हे नियन्त्रण यायेमाःगुलिइ ध्यान बीमाःगु न्ह्यथनादिल । थःपिंसं न्हापानिसें थ्व हे खँ लिसा कयाच्वनागु तकं वयेकलं न्ह्यथनादिल । 

वैठक न्ह्यः इपिडिमियोलोजी तथा रोग नियन्त्रण महाशाखाया निर्देशक डा.वासुदेव पाण्डें येँ थें जाःगु जनघनत्व अप्वः दूगु थासय् संक्रमण अप्वःसा जटिल समस्या वैगु धासें सकलसित सचेत जुइत इनाप यानादिल । लिपांगु इलय् भारतं थीथी ज्या दया स्वनिगः दुहाँ वैपिं अप्व संक्रमित खनेदूगु धासें स्वास्थ्य मन्त्रालयं नाका–नाकाय् पीसीआर यानाच्वंगु न्ह्यथनादिल । स्थानीय तहं तकं अज्याःपिं मनु वःगु स्यूसा अनिवार्य १४ न्हु क्वारेन्टायनय् तयेत इनाप यानादिल । 

वयेकलं अज्याःपिंत परिक्षणया दायराय् हयेत ग्वाहालि फ्वनादिल । मास्क बांलाक तयेगु व सामाजिक दूरी कायम याःसा ७० प्रतिशत संक्रमणया जोखिमं सुरक्षित जुइगु वयेकःया धापु दु । 


Share on Google Plus

News: Newa News

    छ्याता
    फेसबुक छ्याता