जनप्रतिनिधिपाखें दलित समुदाययात देगलय् निषेध


सिन्धुपाल्चोकया त्रिपुरासुन्दरी गाउँपालिका–५ य् ९३ प्रतिशत नेवाः समुदाय च्वनि । थुगु वडायात जिल्लाय् धार्मिक दृष्टिकोणं ऐतिहासिक तौथली सहरया नामं म्हसिउ । गाँया दथुइ त्रिपुरासुन्दरीया देगः दु । तर, देगलय् दलितयात वने मदु ।

वडा ज्याकूया ग्वसालय् बिहीबाः निसें श्रीमद्भागवत ज्ञान महायज्ञ न्ह्यात । त्रिपुरासुन्दरी माई देगःया विकास व अक्षयकोष स्थापनाया नितिं महायज्ञ आयोजना ग्वःगु खः । तर, देगः लागाय् दलितयात प्रवेश निषेध यानातःगु दु । कामी, सार्की व दमाईं जक मखु, नेवाः दुनेया कुसुले व कपालीयात तकं प्रवेश निषेध याःगु स्थानीय मोहनकुमार कपालीं न्ह्यथनादिल ।

कलश क्वबीगु विषयलय् दलित समुदाय व वडाध्यक्षदथुइ विवाद जुगु दु । स्थानीय मोहनकुमार कपालीया कथं देगः दुने ढोकती हितिं कलशय् लः तयाः महायज्ञस्थलय् वःगु इलय् दलित समुदाय व वडाध्यक्षदथुइ विवाद जूगु खः । वडाध्यक्ष विष्णुभक्त श्रेष्ठ व देगःया पुजारीं दलित व चिधंगु जातिया नेवातय्सं कलश क्वबी मज्यू धका उर्दी जारी याःगु खः । कलशयात्राय् ब्वति मकाय्कुगु धासें वडाया मिसा दुजः अञ्जु कपालीं विरोध यानादिल ।

‘दलितं थ्यूसा द्यः तँचाइ धका थःपिंत फुक्क ज्या याका देगलय् धासा दुहाँ वने मब्यूगु खः,’ दलित मिसा दुजः बालकुमारी गदालं न्ह्यथनादिल । दलित समुदाय नं देगलय् छाःगु ध्यबा व चन्दा देगः स्वयां सछि मिटर तापाकं मुंकुगु खः ।

जनप्रतिनिधिं हे सार्वजनिक स्थलय् दलित, कुसुले व कपालीयात थी त्यः मत्यः व जातीय विभेद यासेंलि स्थानीय मोहनकुमार कपाली. पिस्करय् दुगु प्रहरीचौकीइ उजुरी ब्यूगु दु । जिल्ला प्रशासन, प्रहरी व राष्ट्रिय दलित आयोगय् घटनाबारे जानकारी बीग पौ इमेल याःगु दु । घटनाबारे त्रिपुरासुन्दरी गाउँपालिया अध्यक्ष भूपेन्द्र श्रेष्ठं जातीय विभेदया सः महायज्ञय् वःसां स्थानीयया कारण नवाय् मफूगु न्ह्यथनादिल । ज्याझ्वःया मञ्चय् दलितयात प्रवेश निषेध याःगु न्यनागु खः, तर थःम्ह व्यक्तिगत रूपं छुं यायेगु अवस्था मदगु श्रेष्ठं न्ह्यथनादिल ।

दलित समुदाययात विभेद जूसां उलाज्याझ्वलय् वःम्ह गाउँपालिका अध्यक्ष भूपेन्द्र श्रेष्ठ सुम्क च्वंगु दलित मिसा दुजः बालकुमारी गदालं न्ह्यथनादिल । वडाध्यक्षया कारण दलितयात विभेद जूगु वय्कलं द्वपं बियादिल ।

थुगु बुखँ थौंया नयाँ पत्रिकाय् रामकृष्ण थापां च्यादीगु खः ।

Share on Google Plus

News: Newa News

    छ्याता
    फेसबुक छ्याता