छन्हुं ४,१०७ म्ह कोरोना संक्रमित, ३५ म्ह मन्त


लिपांगु २४ घौ दुने थप ४,१०७ म्ह कोरोना भाइरस (कोभिड–१९) या संक्रमण पुष्टि जूगु दु ।

स्वास्थ्य तथा जनसंख्या मन्त्रालयया कथं ११ द्व ३५४ नमुनाया पीसीआर परीक्षण याःगु इलय् २,९७५ म्ह व ४,९४४ एन्टीजेन परीक्षण याना ११३२ म्ह याना ४,१०७ म्ह संक्रमण पुष्टि जूगु खः ।

थ्व नापं नेपालय् कोरोना संक्रमितया ल्याः ७ लख ५ द्व ७२ म्ह थ्यंगु दु । व मध्ये ९ द्व ९५७ म्हया मृत्यु जूगु दुसा ६ लख ६१ द्व ६५१ म्ह संक्रमणमुक्त जूगु दु ।

देन्यंकं सक्रिय संक्रमितया ल्याः ३३ द्व ४६४ म्ह दु । गुकि ३० द्व २७० म्ह होम आइसोलेसनय् दुसा ३ द्व १९४ म्ह संस्थागत आइसोलेसनय् दु । कोरोनाया ल्वगि मध्ये ७१४ म्ह आईसीयू व १५६ म्ह भेन्टिलेटरय् दु । १० दँ क्वयेया ७१ म्ह मस्त कोरोना संक्रमण पुष्टि जूगु दुसा ११ निसें २० दँया २५५ म्ह कोरोना संक्रमण खनेदु ।

स्वास्थ्य मन्त्रालयया कथं दकलय् अप्व येँय् ९०८, झापाय् २९६, कास्कीइ २२६, यलय् २०६, ख्वपय् १६५ व मोरङय् १३२ म्ह कोरोना संक्रमण पुष्टि जूगु दु ।

अथेहे मकवानपुरय् १०२, सुनसरीइ ९९, चिनवनय् ९२, रुपन्देहीइ ६१, नवलपारसी पूर्वय् ५८, तनहुँइ ५५, नुवाकोटय् ५३ व गोरखाय् ४९ म्ह कोरोना संक्रमित थप जूगु खः ।


Share on Google Plus

News: Newa News

    छ्याता
    फेसबुक छ्याता