राजीनामा फ्वंगु मदु, जिम्मेवारीया विकल्प न्यंगु खः, अन्याय जूसा अदालत वने : हितेन्द्रदेव शाक्य


नेपाल विद्युत प्राधिकरणया प्रमुख कार्यकारी निर्देशक हितेन्द्रदेव शाक्यं सरकारं थःगु राजीनामा मफ्वंगु तर वैकल्पिक व्यवस्थाबारे न्यंगु स्पष्ट यानादीगु दु । मंगलबाः प्रधानमन्त्री शेरबहादुर देउवां प्राधिकरणया कार्यकारी निर्देशक शाक्यया थासय् हाकनं कुलमान घिसिङयात हे नियुक्त यायेगु उजँ ब्यूगु प्रधानमन्त्रीया सचिवालयं सार्वजनिक याःगु खः ।

उकिया कन्हेकुन्हु थौं बुधबाः पत्रकारत नाप खँ ब्याकुसें शाक्यं सरकारं थःगु राजीनामा मफ्वंगु न्ह्यथनादिगु खः । थःगु क्षमता व दक्षता कथं सरकारं ब्यूगु ज्या यायेत थाकु मजूगु वयेकलं न्ह्यथनादिल । वयेकलं थः अपमानजनक तरीकां मखु सम्मानजनक रुपं आःया पदं पिहाँवयेत तयार जुयागु संकेत तकं बियादिल ।

वयेकलं कोरोना महामारीया दथुइ प्राधिकरणय् च्वना थःम्हं उल्लेख्य ज्या यानागु न्ह्यथनादिल । अदालत वनेगुला धका न्यंगु न्ह्यसलय् वयेकलं विकल्प बिया ज्या याकुसा अदालत वनेमाःगु कारण मदुगु न्ह्यथनादिल । अन्याय जूसा अदालत वने मालिगु वयेकलं न्ह्यथनादिल ।

लोडसेडिंग चीकुम्ह कुलमान घिसिंङया कार्यकाल क्वचायेधुंका घिसिङयात हे निर्देशक दयेकेमाःगु माग वयाच्वंगु इलय् केपि ओली सरकारं तने मफइगु धासें शाक्ययात नियुक्त याःगु खःसा देउवा सरकार वयेधुंका हाकनं घिसिङयात पदभार बीत्यंगु खः ।


Share on Google Plus

News: Newa News

    छ्याता
    फेसबुक छ्याता