कासा, कासामि, संघ व थुगु लागाया जिम्मेवारी व कर्तब्यय् केन्द्रित राष्ट्रिय व अन्तर्राष्ट्रिय कासा विज्ञतयेगु प्रस्तुतीनापं नेपाल ओलम्पिक कमिटीया ग्वसालय् स्वक्वःगु राष्ट्रिय स्पोर्टस फोरम आइतबाः क्वचाल । भर्चुअल ज्याझ्वलय् विज्ञपिनिगु प्रस्तुतीइ सहलह जूगु खः । कासा लागा, संघ व पदाधिकारीयात ओलम्पिक अभियान व ओलम्पिक भ्यालुज अथेहे कासानाप सम्बन्धित गतिविधिबारे जानकारी बीत थ्व ज्याझ्वः याःगु खः । ज्याझ्वलय् श्रीलंकाली ओलम्पिक कमिटीया महासचिव म्याक्सवेल डि सिल्भा व एसियाली ओलम्पिक कमिटी (ओसीए) प्रतिनिधि प्रोफेसर बीएलएच परेरासं ‘ओलम्पिक मूल्य व मान्यता’ बारे थःगु प्रस्तुती न्ह्यब्वयादिल । उगु इलय् परेरां ओलम्पिक मूल्य व मान्यताबारे सजगता हयेत ब्वनेकुथि स्तरय् ज्याझ्वः न्ह्याकेमाःगु न्ह्यथनादिल ।
अथेहे अन्तर्राष्ट्रिय ओलम्पिक कमिटी (आईओसी) दुजः स्वेङ मिन र्युं ‘कासा व लकस’ बारे न्ह्यथंसें आःया इलय् लकसया विषय दकलय् गहन जूगु न्ह्यथंसें कासा लागाय् दकलय् अप्व भूमिका म्हितेमाःगु न्ह्यथनादिल ।
ज्याझ्वलय् नेपाल ओलम्पिक कमिटी मेडिकल कमिसनया नायः डा. सरोजकृष्ण श्रेष्ठं ‘कोभिड–१९’ व नेपाल खेलकुद पत्रकार मञ्चया नायः दूर्गा सुवेदीं ‘संचार लागा व मार्केटिङ’, युवा तथा खेलकुद मन्त्रालयया सचिव रामप्रसाद थपलियां ‘खेलकुद संरचना व पद्धति’ बारे थःगु प्रस्तुती बियादिल । अथेहे राष्ट्रिय खेलकुद परिषदया आर्थिक विभाग प्रमुख ऋषिराम पोखरेलं ‘राष्ट्रिय खेलकुद परिषदया लेखा प्रणाली’, उमेश ढकालं ‘कर प्रणाली’, वरिष्ठ अधिवक्ता लोकभक्त राणां ‘खेलकुद ऐन २०७७’ बारे न्ह्यब्ययादिल ।
ज्याझ्वःयात नेपाल ओलम्पिक कमिटीया नायः जीवनराम श्रेष्ठं लसकुस यानादिगु खः । ज्याझ्वलय् नागरिक, उड्डयन तथा संस्कृति मन्त्री योगेश भट्टराई मू पाहाँ कथं झाःगु खः । राष्ट्रिय खेलकुद परिषदया सदस्य सचिव रमेश सिलवालं नेपाली कासाया नितिं थज्याःगु ज्याझ्वः जुइमाःगु न्ह्यथंसें नेपाली कासा धेधेबल्ला न्ह्याकेगु न्ह्यथनादिल । वयेकलं स्वकुमि नापंया धेधेबल्ला, म्हाे स्वकुमि तया वा स्वकुमि हे मतःसे धेधेबल्ला यायेगु विकल्प न्ह्यथनादिल ।
महासचिव निलेन्द्रराज श्रेष्ठं ज्याझ्वलं यक्व जानकारी प्राप्त जूगु न्ह्यथनादिल । वयेकलं अन्तर्राष्ट्रिय कासा धेधेबल्ला याकनं जुइगु तकं न्ह्यथनादिल । कमिटीया उपाध्यक्ष व कार्यकारी निर्देशक चतुरानन्द राज बैद्यं न्ह्याकुगु ज्याझ्वलय् १३ क्वःगु दक्षिण एसियाली कासाय् नेपाःयात स्वर्ण पदक ब्यूपिं १३ गु संघयात प्रशंसा पत्र लःल्हाःगु खः ।
0 Comments:
Post a Comment