म्याराडाेना ६० दँया बैशय् मन्त


फुटबलया आःतकया दकलय् नांजाःपिं मध्येया छम्ह डिएगाे म्याराडाेना खुइदँया बैशय् मन्त । अर्जेन्टिनी १० नम्बरी दथुं म्हितिम्ह नापं म्यानेजर म्याराडाेना हृदयघात जुया मदूगु खः । वयेकःया नाेवेम्बरया न्हापांगु वा न्ह्यपुइ हि ख्वःगुया सफलतापुर्वक शल्यकृया जूगु खःसा वयाँलिपा अएलाया लतया उपचार तकं याःगु खः ।


अर्जेन्टिनां १९८६ वर्ल्ड कप त्याःगु इलय् म्याराडाेना कप्तान खःसा उगु वर्ल्ड कप म्याराडाेनाया याकः कुतलं जूगु यक्व विज्ञतयेगु धापु दु । म्याराडाेनां बार्सिलाेना व नापाेलीया नितिं क्लब फुटबल म्हितुगु खः । वयाँलिपा सन १९९० सालय् नं म्याराडाेनाया कप्तानी फाइनल तक थ्यंगु खः । तर पश्चिम जर्मनीनाप बुना वहया मेडल त्याकल । अथेहे सन १९९४ सालय् तकं कप्तान जूगु खःसा लागु वासःया छ्यलाबुलाया कारण लित छ्वःगु खः ।

म्याराडाेना लागु वासःया दुर्ब्यसननाप ल्वानाच्वंम्ह खः । १९९१ सालय् १५ ला तक फुलबलं ब्यान तकं जूगु खः । १९९७ सालय् वयेकलं फुटबलं सन्यास काःगु खः । सन २००८य् वयेकः अर्जेन्टाइन टिमया मू प्रशिक्षक जूगु खः ।

म्याराडाेनाया ल्हातं याःगु गाेल तसकं लाेकप्रिय गुकियात ह्याण्ड अफ गड तकं धाल अथेहे फुटबल मैदानं मेगु पुचःया दक्व कासामियात छलय् याना याकःचा गाेल याःगु तकं लाेकप्रिय । 

वयेकःया मृत्यु नापं फुटबलया छगु युगया अन्त्य जूगु दु ।




Share on Google Plus

News: Newa News

    छ्याता
    फेसबुक छ्याता