नेपामि उद्धार यायेत छवाः तक चार्टर्ड उडान


कोभिड–१९ महामारीया कारणं थीथी देसय् अलपत्र जूगु नेपामिया उद्धारया लागि थौंनिसें स्वंगुगु चरणया चार्टर्ड उडान जुइत्यंगु दु । नेपाल वायुसेवा निगम (नेपाल एयरलाइन्स) व हिमालय एयरलाइन्सनापं थीथी देया एयरलाइन्सं नेपामिया उद्धारया लागि छवा चार्टर्ड उडान यायेत्यंगु खः ।

संस्कृति, पर्यटन तथा नागरिक उड्डयन मन्त्रालयं वैगु जुलाई १५ निसें २२ तकया चार्टर्ड उडान तालिका सार्वजनिक याःगु दु । व कथं नेपाल एयरलाइन्स व हिमालय एयरलाइन्सं चार्टर्ड उडान तालिका देका थौं निसें उडान शुरु याःगु दु । लिपांगु चरणय् ४२ उडान जुइत्यंगु दु । थुकि नेपाल एयरलाइन्सया २४ उडान जुइत्यंगु दुसा हिमालयया १५ उडान जुइत्यंगु दु ।

नेपाल एयरलाइन्सं दुबईया निगु उडान याइसा हिमालय एयरलाइन्सं आबुधाबीइ निगु उडान यायेत्यंगु दु । अथेहे एयर अरेबिया, फ्लाई दुबईं न्हिथं छगु उडान याइसा जजिरा एयरं न्हिथं निगु उडान यायेत्यंगु दु ।

थूगु एयरलाइन्सं चीनया थीथी गन्तव्य, बङ्गलादेश, मलेशियाया क्वालालम्पुर, साउदी अरेबियाया रियाद, दमाम, युएईया अबुधाबी, कतारया दोहा, बहराइन, कुवेत, जापाननापं देसं नेपामियात लितहइगु न्ह्यथंगु दु । त्रिभुवन अन्तर्राष्ट्रिय विमानस्थलय् न्हिथं १६ गु तक चार्टर्ड उडान जुयाच्वंगु दु ।

Share on Google Plus

News: Newa News

    छ्याता
    फेसबुक छ्याता