प्रधानमन्त्री ओलीयाके ५५ लाख डलर गनं वल ?


प्रधानमन्त्री केपी शर्मा ओलीया स्विट्जरल्यान्डया जेनेभाय् च्वंगु मिराबाउन्ड बैंकय् ५५ मिलियन डलर दूगु दाबी रोलन्ड ज्याक्वार्डं याःगु दु । ग्लोबल वाच एनलाइसिसय् नेपाः चिनिया सम्पर्कय् प्रधानमन्त्री केपी ओली शिर्षकय् च्वयातःगु लेखय् ओली नापं राधिका शाक्यया मंका बैंक खाताय् ५५ लाख डलर दूगु व दँय् दसं ५ लाख डलर व्याज नयाच्वंगु न्ह्यथंगु दु ।

प्रधानमन्त्री ओलीया थूगु ध्यबा छुँ दँ दुने मुंकुगु तकं उगु लेखय् उल्लेख यानातःगु दु । ओलीं प्रधानमन्त्री पद काय् धुंका उबलय् नेपाःया नितिं चिनियाँ राजदूत उ चुन्ताइं ओलीयात कम्बोडियाया टेलिकम्युनिकेशन लागाय् लगानी यायेत ग्वाहालि याःगु व सम्झौताय् ओलीया सतीम्ह व्यापारी आङ छिरिङ शेर्पां ग्वाहालि याःगु उल्लेख यानातःगु दु । कम्बोडियाया प्रधानमन्त्री हुन सेन व चिनियाँ राजदूत बो जिआङेओया ग्वाहालिइ ओलीया लगानी कम्बोडियाइ सुरक्षित जूगु न्ह्यथंगु दु ।

थुकियात ओलीं निक्वगु खुसि प्रधानमन्त्रीया पद कःघाःगु इलय् तकं निरन्तरता ब्यूगु न्ह्इथनातःगु दु । चीनं नेपाः थें जाःगु देया मेपिं नेतातयेत थुकथं ध्यबा बिया भ्रष्ट दयेकुगु दाबी यानातःगु दु । चिनियाँ नेतानाप ध्यबा कया प्रधानमन्त्री ओलीं चिनियाँ कम्पनीयात थीथी परियोजना ब्यूगु द्वपं तकं बियातःगु दु । डिसेम्बर २०१८य् डिजिटल एक्शन रुमया परियोजना चिनियाँ कम्पनी हुवावेइयात प्रतिस्पर्धा मयाःसे ब्यूगु, नेपाल टेलिकमयात थूगु परियोजनां अलग याःगु, प्रधानमन्त्री ओलीया राजनीतिक सल्लाहकार विष्णु रिमालया काय्यात थ्व सम्झौता ब्यूगु, मे २०१९य् नेपाल टेलिकमं हङकङया चाइना कम्युनिकेशन सर्भिसनाप रेडियो नेटवर्क नापंया १९ अर्बया सम्झौता याःगु उल्लेख यानातःगु दु ।

लेखय् ओम्नी कम्पनी नापंया भ्रष्टाचारया खँ तकं उल्लेख यानातःगु दु । भ्रष्टाचारया खँ नेपाःया प्रधानमन्त्रीयात न्हूगु खँ मजूगु उल्लेख याःसें लेखय् थ्व ज्या केपी ओली व चिनिया समकक्षीया नितिं धाःसा फाइदाया खँ जूगु उल्लेख यानातःगु दु ।

थुकथं तःधंगु द्वपं तया पिहाँ वःगु लेखं न्ह्यसः थंगु दु ओलीयाके ५५ लाख डलर गनं वल ? नेपाःया प्रधानमन्त्रीं थुकथं छुं दँ दुने आम्दानी याःगु करोडौं ध्यबां देया नां च्वनी कि वनी अनुसन्धानया विषय खः ।

source: Global Watch Analysis


प्रमया प्रेस सल्लाहकारपाखें स्वीस बैङ्कय् प्रधानमन्त्री ओलीया ५५ लख डलर दूगु बुखँया खण्डन


Share on Google Plus

News: Newa News

    छ्याता
    फेसबुक छ्याता