२६ जेठ, राष्ट्रिय जनता पार्टी नेपाल व समाजवादी पार्टी स्वाना जनता समाजवादी पार्टी गठन जुइधुंका वरियता विवाद दःसां निर्वाचन आयोगय् दर्ताया नितिं निवेदन ब्यूगु दु ।
पार्टी दर्ताया निवेदन बीत म्हिगः आइतबाः सनिल न्याता इलय् जसपाया शीर्ष नेतात कान्तिपथया निर्वाचन आयोग ज्याकुथि थ्यंगु खः । पार्टी दर्ताया लागि सुचं बिया ४५ न्हु जुइधुंकुगुलिं पार्टी दर्ताया निवेदन बीमाःगु बाध्यता जूगु खः ।
जनता समाजवादी पार्टीया नेता शिवजी यादवं निम्ह अध्यक्ष व स्वम्ह बरिष्ठ नेता दैगु कथं पार्टी दर्ताया निवेदन ब्यूगु खः । सुरूइ पार्टीइ छम्ह संघीय परिषद् अध्यक्ष व निम्ह केन्द्रीय परिषद अध्यक्ष जुइगु सहलह जूगु खः ।
थ्व कथं पूर्वप्रधानमन्त्री बाबुराम भट्टराई संघीय परिषद अध्यक्ष जुइत्यंगु खः । समाजवादी पार्टीया नेता अशोक राईं पार्टी दर्ता यायेधुंका निर्वाचन आयोग परिसरय् संघीय परिषद् अध्यक्ष बरियताय् न्हापांगु नम्बरय् लाइगु न्ह्यथनादीगु खः ।
तर लिपा सार्वजनिक जूगु पतिइ भट्टराई प्यंगुगु नम्बरय् लाःगु दु । राजपा नेता महन्थ ठाकुरं बाबुरामयात थः स्वयाँ च्वय् तयेत अस्वीकार यायेधुंका भट्टराई तँचाःगु खः ।
निर्वाचन आयोगय् दर्ता जूगु पतिइ भट्टराई ठाकुरलिपा निगुगु नम्बरय् तयातःगु खः । तर भट्टराई थःम्हं निगु नम्बरय् मच्वनेगु बरु उपेन्द्र यादव व अशोक राईलिपा प्यंगुगु नम्बरय् च्वनेगु धाःगु खः । लिपांगु इलय् पुर्व प्रधानमन्त्री भट्टराईया नां टिपेक्स तया अशोक राई व राजेन्द्र महतोया दथुइ तयेत यंकुगु खः ।
जसपाय् सछि व ५१ म्ह दूगु राजनीतिक समिति, ७०१ म्हेसिया केन्द्रीय कमिटी व निम्ह अध्यक्षया सामूहिक निर्णयया आधारय् न्ह्यायेत्यंगु दु ।
स्रोतया कथं आः पार्टी दर्ता जूसां संघीय परिषदया नायः बाबुराम भट्टराई जुइगु व संसदीय दलया नेता राजेन्द्र महतो जुइगु आन्तरिक सहमति जूगु दु ।
वंगु वैशाख १० गते चान्हय् समाजवादी व राजपा एकीकरणया सहमति जूगु खः ।
छ्याता
फेसबुक छ्याता