भैरहवाया भीम अस्पतालं २६ म्ह कोरोना संक्रमित डिस्चार्ज जूगु दु ।
वंगु जेठ १९ व २० गते कोरोना विशेष अस्पतालया आइसोलेसन वार्डय् भर्ना जूपिं २८ म्ह मध्ये २६ म्ह मंगलबाः डिस्चार्ज जूगु दु । १४ न्हु आइसोलेसनय् च्वंपिं २६ म्ह कोरोनाया लक्षण खने मदुसेंलि पीसीआर परीक्षण हे मयाःसे डिस्चार्ज याःगु अस्पतालं न्ह्यथंगु दु ।
डिस्चार्ज जूपिं रुपन्देहीया सैनामैना नगरपालिकाया १९ दँ दुम्ह मिसा, ४१ व ४३ दँ दुम्ह मिजँ, कोटहीमाई गाउँपालिकाया ७० दँया मिसा व ४२ दँया मिजँ, मायादेवी गाउँपालिकाया १५ निसें ४५ दँया ५ म्ह मिजँ दु ।
अथेहे कपिलवस्तुया बाणगंगा नगरपालिकाया ३३ व ४१ दँया निम्ह मिसा, बुद्धभूमि नगरपालिकाया १९ निसें ४७ दँया ११ म्ह मिजँ, शिवराज नगरपालिकाया २४ दँया मिसा, नवलपरासीया रामग्राम नगरपालिकाया २२ व सरावल गाउँपालिकाया २६ दँया मिजँ दु ।
आः अस्पतालय् छम्ह प्वाथये दुम्ह नापं निम्ह जक आइसोलेसनय् दु । थ्व न्ह्यः जेठ १९ गते उगु अस्पतालं २५ म्ह डिस्चार्ज जुइधुंकुगु दु ।
छ्याता
फेसबुक छ्याता