छखा छेँ छम्ह रक्तदाता अभियानं येँ पिने तकं गति कयाच्वन


कोरोना भाईरस (कोभिड १९)या हुनिं जुयाच्वंगु लकडाउनया अवस्थाय् हिया अभाव मजुइकेत नेपाल रेडक्रस सोसाईटी महाबौद्ध उपशाखा व येँ जिल्ला शाखा मंका कथं “छखा छेँ छम्ह रक्तदाता” अभियान न्ह्याकुगु स्ववा जुल ।

थूगु अभियान कथं नेपाल रेडक्रस सोसाईटी महाबौद्ध उपशाखाया संयोजनय् थानकोट चन्द्रागीरी निवासी ऋतु कुमार श्रेष्ठ, मुक्ति श्रेष्ठ व बेन्जु श्रेष्ठया न्ह्यलुवाय् ख्वप रक्त संचार केन्द्र (ब्लड बैंक) पाखेँ बैशाख ७ गते हि मुनेज्या जुल । चन्द्रागिरी नगरपालिका वडा नं ३ अन्तर्गत थानकोट लागाया २० म्ह स्थानीयं हिदान याःगु खः ।
लकडाउनया इलय् हि म्हो जूगलिं पासापिंत मुंका हिदानया अपिल यानागु ऋतु कुमार श्रेष्ठं न्ह्यथनादिल । छेँ हे वया हि मुंकिगु न्ह्यथंगुलिं छेँ हे रेडक्रस सोसाइटीयात सःता हिदान ज्याझ्व यानागु श्रेष्ठया धापु दु । महामारीया इलय् हि म्हो जुया सुयां नं ज्यान मवनेमा धका श्रेष्ठं कामना तकं यानादिल ।


लकडाउनया इलय् हिदान ज्याझ्वः यायेत व्यक्तिगत सुरक्षाया दक्व साधन तया सावधानिक रुपं हिदान क्वचायेकागु महाबौद्ध उपशाखाया सभापति योगेश कुमार शाहीं न्ह्यथनादिल । छेँखाँ छम्हेस्यां नियमित हि दान यायेमाःगु वयेकःया धापु दु ।

“छखा छेँ छम्ह रक्तदाता” अभियानं महामारीया इलय् तकं व्यापकता कयाच्वंगु उपशाखाया सचिव प्रकाश अमात्यं न्ह्यथनादिल । सामाजिक दुरी कायम याना संक्रमणया सुरक्षा व्यवस्थापन याना हे हि संकलन यानागु अमात्यं न्ह्यथनादिल ।

हि दातात छेँ हे लकडाउनय् लाःगुलिं रेडक्रसं छेँ हे हि संकलन अभियानयात तीव्रता ब्यूगु दु । थूगु अभियान २१ चैत्रं न्ह्याःगु खःसा आःतक ख्वप ब्लड बैकय् १००० युनिट हि मौजात जूगु हि संचार केन्द्रया प्राविधिक दामोदर नकमिं न्ह्यथनादिल ।

Share on Google Plus

News: Newa News

    छ्याता
    फेसबुक छ्याता