जुगलया म्येमुना ‘सिरपा’ पिदन


‘बुदिंया भिंतुना’ कभर म्ये कासाया उत्कृष्ट न्याम्ह प्रतिस्पर्धीया म्येमुना ‘सिरपा’ सार्वजनिक जूगु दु । संगीतकार जुगल डंगोलया संगीतय् सृजना जूगु ‘सिरपा’ म्येमुना आर्टोम्यूज रेकर्डिङ स्टुडियोया न्ह्यब्वया खः ।

नेपालभाषा संगीत ख्यलय् छगू दसूकथं काःगु सुरजवीर बज्राचार्यं च्वयादीगु, हालादीगु व जुगल डंगोलया संगीत संयोजनया ‘बूदिंया भिंतुना म्ये’ या कभर कासाय् हलिंन्यकया १२१ कासामि ब्वति काःगु खः । पेजथ्री बाःछिपौया ग्वसालय् जूगु थुगु कासा चेज टेलिभिजनया प्रायोजनय् जूगु खः ।

थुगु हे कासाया सिरपाकथं पिदंगु ‘सिरपा’ म्येमुनाय् सुरजवीरं च्वयादीगु अले न्हाप लाःम्ह म्येहालामि उत्तम महर्जनं हालादीगु ‘मफुत म्वाय् थ्व जीवन’, दर्शनवीर शाक्यं च्वयादीगु व मुकेश शाक्यं हालादीगु ‘छंगु हे खँ ला खः’, प्रकाश दीप श्रेष्ठं च्वयादीगु व सुमन मानन्धरं हालादीगु ‘भुतुमाली ब्वःथें’, पूर्णकाजी ज्यापुं च्वयादीगु व रविन्सन कसाःनं हालादीगु ‘बांलाबांलाचिंगु मिखा’, हरिराम महर्जन थेचों च्वयादीगु व परमेश मल्लं हालादीगु ‘सिरिसिरि वसन्तया फसय्’ म्ये दुथ्याः । 

यल लायकूया नासः चुकय् जूगु म्येमुना पिथना ज्याझ्वलय् वरिष्ठ गायक जुजुकाजी रंजित, जनसंगीत श्रष्टा अमरराज शर्मा, इलोहं प्रकाशनया प्रवन्ध निर्देशक नरेशवीर शाक्य, ललितपुर महानगरपालिका वडा नं १६ का अध्यक्ष निर्मलरत्न शाक्य, संगीतकार जूगल डंगोल, म्येमुना पिकाकः आर्टोम्यूज रेकर्डिङ स्टुडियोया प्रवन्ध निर्देशक केञ्जुमा सुब्बा, चेज टेलिभिजनया उत्पादक गोल्मा कम्पनीया प्रमुख सुरेश मल्ल, हिरण्यवर्ण महाविहारया आःजु चित्रवीर बज्राचार्य व नेपाल घरेलु तथा साना उद्योग महासंघका पूर्व अध्यक्ष सुरेश प्रधानं म्येमुना सार्वजनिक यानादीगु खः ।  

ज्याझ्वःया संयोजक दर्शनवीर शाक्यं लसकुस यासें न्ह्याःगु थुगु ज्याझ्वलय् पाहाँपिन्सं बूदिंया भिंतुना म्ये व म्येकासापाखें समाजय् उत्साह ब्वलंगु धयादिसें । न्हूपिं बांलापिं म्येहालामिपिनिगु नितिं लँपु चायेकाब्यूगु उल्लेख यानादीगुख खःसा यल महानगरपालिका वडा नं १६ या अध्यक्ष निर्मलरत्न शाक्यं सिरपा म्येमुनाया म्येहालामिपिं कासाया उत्कृष्ट न्याम्ह म्येहालामिपिनिगु नितिं थःम्ह नं छगू म्येमुना पिथनेगु प्रतिवद्धता प्वंकादिल । 

यल महानगरपालिका वडा नं १६ या सह–आयोजनाय् जूगु थुगु ज्याझ्वः पेजथ्री बाःछिपौपाखें ग्वसाःग्वःगु खः । चेज टेलिभिजनया ग्वाहालिइ जूगु थुगु ज्याझ्वलय् उत्कृष्ट म्येहालामिपिन्सं म्येमुनाय् दुथ्याःगु म्ये नं न्यंकादीगु खःसा ज्याझ्वः सुरजवीर बज्राचार्यं न्ह्याकादीगु खः । 

Share on Google Plus

News: Newa News

    छ्याता
    फेसबुक छ्याता