कोरोनाविरुद्ध येँ महानगरपालिकां न्ह्याकल जनचेतना अभियान


कोरोना भाइरस (कोभिड–१९) या संक्रमण हलिंन्यंकं जुयाच्वंगु दु । ग्याःचिकु अप्वयाच्वंगु इलय् येँ महानगरपालिकां बृहत जनचेतनामूलक ज्याझ्वः यायेत्यंगु दु । वंगु शुक्रबार राष्ट्रिय सभागृहलय् काठमाडौं महानगरपालिकां ग्वसाः ग्वःगु कोरोना व डेंगु ल्वय्या महामारीसम्बन्धी बृहत जनचेतना ज्याझ्वलय् येँ महानगरपालिकाया मेयर विद्यासुन्दर शाक्यं ३२ गु वडाय् जनचेतनामुलक ज्याझ्वः ग्वसाः ग्वय्त्यनागु न्ह्यथनादिल । सामाजिक सञ्जाल व छुं मिडियाय् वःगु म्वाःमदुगु हल्लां ग्याय् म्वाःगु वयेकलं न्ह्यथनादिल । दक्व नापं जाना थज्यागु महामारीं गुकथं बचे जुइगु व व्यवस्थापन यायेगु पाखे जुइमाःगुलिइ जोड बियादिल । कोरोनाया हल्लां हाकु बजाः तकं अप्वःगु वयेकलं दाबी यानादिल । ताल्ला नापं डेंगेया महामारी अप्वइगु जूगुलिं सचेत जुइत तकं इनाप यानादिल । महामारी जुलकि नियन्त्रण पिने वनेफूगु जूगुलिं महामारी जुइके मबीत जनचेतनामुलक ज्याझ्वः यायेत्यनागु वयेकलं न्ह्यथनादिल ।

येँ महानगरपालिकाया निमित्त प्रमुख प्रशासकीय अधिकृत राजेश्वर ज्ञवालीं नं सहरी स्वास्थ्य क्लिनिकं बीगु सेवायात थप विस्तार याना सेवा बीगुलिइ महानगरपालिका जायेमाःगु न्ह्यथनादिल ।

स्वास्थ्य सेवा विभागया महानिर्देशक महेन्द्रप्रसाद श्रेष्ठं सरकारं उच्च सतर्कता क्यंगु धाःसें आत्ते जुइम्वाःगु न्ह्यथनादिल । इपिडेमियोलोजि तथा रोग नियन्त्रण महाशाखाया प्रमुख डाक्टर बासुदेव पाण्डें आःतक ५०० म्हेसिया लाः व न्हिया नमुना परीक्षण याना छम्ह जक पोजेटिभ खनेदूगु व उम्ह ल्वगि नं लने धुंकुगु न्ह्यथनादिल । आः हे ग्याय् माःगु अवस्था मवःनीगु वयेकःया धापु दु । ज्याथजिथि, ल्वय् नाप प्रतिरोधात्मक क्षमता म्हो जूपिं व प्वाथय् दुपिंत अप्व समस्या खनेदूगु वयेकलं न्ह्यथनादिल । इपिडेमियोलोजि तथा रोग नियन्त्रण महाशाखाया मेम्ह डाक्टर प्रकाश शाहं ताल्लाय् डेंगेया महामारी जुइगुलिं सचेत जुइमाःगु न्ह्यथनादिल ।

Share on Google Plus

News: Newa News

    छ्याता
    फेसबुक छ्याता