२०७६ फागुन २४ शनिबार
यल / नेवाः देय् दबूया नायः नरेश ताम्रकारं सरकारं हाकनं गुठी विधेयक हयेगु तयारी न्हयाकेधुंकूगु धासें हाकनं थुकिया विरोधय् कुहांवयेगु नितिं तयार जुयाच्वनेत सकसितं आव्हान यानादीगु दु । राजोपाध्याय समाजया खुक्वःगु दँ मुँज्या व हना ज्याझ्वलय् दबूया नायः ताम्रकारं थथे धयादीगु खः ।
ज्याझ्वलय नवासें ताम्रकारं सरोकारवालातय्गु सलहल व ब्वति मदय्कं हयेत्यंगु गुठी विधेयक थःपिन्त गुगु नं हालतय् स्वीकार मजुइगु धयादिल । थुकिया विरोधय् हाकनं सडक क्वाकेमाःगु अवस्था वयेफुगु धासें दक्वं जातीय अले सामाजिक संघसंस्थात तयार जुयाच्वनेमागु धयादिल ।
ज्याझ्वलय् थःथःगु ख्यलय् विशिष्ट योगदान बियाः समाजया नां थकाःगु धासें निम्ह व्यक्तित्वयात सम्मानित याःगु खः । धर्म, सँस्कृति, परम्पराया अध्ययन, अनुसन्धानय् निरन्तर योगदान ब्यूम्ह सँस्कृतिविद् महेश्वर जुजु राजोपाध्याययात ज्याझ्वलय् हंगु खः । अथे हे, बास्केटबल कासाया राष्ट्रिय कासामि सुब्रत राजोपाध्याय नं सम्मानित जुल । सम्मानित निम्हेसितं समाजया नायः अमरराज राजोपाध्यायं दोसल्ला न्ययेकादिल सा दबूया नायः ताम्रकारं हनापौ लःल्हानादिल ।
सम्मान लःल्हाना कायेधुंकाः सँस्कृतिविद् जुजुं वैदिक सभ्यता विकास जुइ न्ह्यःया सभ्यता, सँस्कृतिया अध्ययन यानाः अभिलेखीकरण यायेमाःगुलिइ बः बियादिल ।
मेम्ह सम्मानित बास्केटबल कासामि सुब्रत राजोपाध्यायं ख्यालं ख्यालं बास्केटबल म्हितु म्हितुं राष्ट्रिय कासामि तकं जुइखन धासें थःगु ख्यलं समाजया लागिं छुं योगदान बी खंगु महसुस जूबलय् गर्व ताःगु धयादिल ।
व हे ज्याझ्वलय् २०७५ सालया एसइइ परीक्षाय् ताःलाःपिं राजोपाध्याय विद्यार्थीतय्त नं सम्मानित याःगु खः । समाजया वार्षिक कार्य प्रगती प्रतिवेदन न्ह्यब्वसें समाजया मू छ्यान्जे बिराजकाजी राजोपाध्यायं समाजय् दुने सुलाच्वंपिं प्रतिभा मालेगु झ्वलय् थुगुसी गायन प्रतिभा मालेज्या न्ह्याःगु धासें आकिवं हुलाप्याखंया प्रतिभा मालेगु उद्घोष यानादिल । दांभरिं जयन्ती शर्मा राजोपाध्यायं आर्थिक प्रतिवेदन न्ह्यब्वयादिल ।
समाजया निवर्तमान नायः वदन ज्वालानन्द राजोपाध्यायं वंगु फागुन १७ गते क्वचाःगु राजोपाध्याय गायन प्रतिभा मालेज्याया अडिसनय् ल्यज्याय् लाःपिनिगु नां नां सार्वजनिक यानादिल । समाजया नायः अमरराज राजोपाध्यायं समाजया वृहत्ततर विकासया लागिं न्ह्याबलें क्रियाशील जुयाच्वनेगु प्रतिवद्धता प्वंकादिल ।
ज्याझ्वलय् वैदिक प्रतिष्ठानया नायः उपेन्द्रभक्त सुवेदी, ज्यापु समाजया छ्यान्जे सरिता महर्जन, राजकर्णिकार समाजया नायः सुवर्णराज राजकर्णिकार, नेवाः पत्रकार राष्ट्रिय दबूया नायः सुरजबीर बज्राचार्य लिसें जातीय लिसें मेमेगु सामाजिक संघसंस्था व थीथी तगिंया सरकार दथुइया सहकार्यं समाजया विकास जुइफइगुलिइ बः ब्यूगु खः ।
स्वनिगःया द्यःब्रम्हू राजोपाध्यायतय्गु कुसा संगठनया रुपं राजोपाध्याय समाजया गठन २०६४ सालय् जूगु खः । समाजं दँय्दसं समाजयात थीथी कथं योगदान ब्यूपिं व्यक्तित्वयात हनावःगु दु ।
छ्याता
फेसबुक छ्याता