कोरोनाया प्रभावया कारण होली सुनसान


थौं होली पर्व । हिमाली नापं पहाडी लागाय् रंगया पर्व होली धुमधाम कथं न्यायेकी । तर थुगुसि हलिंन्यंकं जुयाच्वंगु कोरोनाया प्रकोपया कारणं येँया होली धाः सुनसान खनेदुगु दु । न्हापा जूसा होली सुरु जुइ न्ह्यः हे होलीया माहौल जुइगु । तर थौं होलीया दिं हे सुनसान खनेदु । नेपालय् कोरोनाया संक्रमण खने मदुनि । तर थ्व औपचारिक रुपं तथ्यांक मवःगु खः । झीके अज्यागु संरचना मदु गुकिं हरेक मनुया तथ्यांक कायेफइ । व हे जूगुलिं कोरोना नेपालय् दु मदु थथें धाय् मफूगु खः । उकि नं विदेशं वःपिं मनुत व पर्यटकतय् ल्याः उलि हे मात्राय् दु । नेपालं पिहाँ वंपिंत कोरोना खनेदूगु बुखँ झन ग्याःचिकु ब्वलंगु दु । ज्वर वय् साथ क्यं वनेगु बानी मदुगुलिं गुलि संक्रमित मनुत थुखे उखे जुयाच्वन धैगु नं तथ्यांक मदु ।

सचेत जुया थः व थः स्याःन्याःपिंत थूगु संक्रमण पाखें बचे यायेगु हे बांलागु ज्या जुइ । अझ थूगु भाइरसं ज्याथ जिथि व मस्तयेत ग्यानापुगुलिं थःगु स्वास्थ्य व सरसफाइया भरपुर ध्यान बीमा । हाछिउँ तय् बलय्, मुसु तय् बलय् रुमाल वा ल्हातं त्वपुइगु, ल्हाः इलय् ब्यलय् सिलेगु, हाइजिनय् बिचा यायेगु याःसा थुगु संक्रमण बिकराल रुप काइमखु । झी सचेत जुइनु ।

होली म्हितेबलय् हुलमुलय् मखु थः पासा भाइ नापं न्ह्यइपुका न्यायेकादिसँ ।

Share on Google Plus

News: Newa News

    छ्याता
    फेसबुक छ्याता