निवाः न्ह्यः नेपालं बिदा क्वचायेका अस्ट्रेलिया वंम्ह ब्वनामियाके कोरोना भाइरस खनेदत । अस्ट्रेलियाया तास्मानियाय् नीदँ दुम्ह उम्ह संक्रमित ब्वनामियात आइसोलेसनय् तयाः उपचार जुयाच्वंगु दु । नेपाःया स्वास्थ्य विभागं थ्व खँ न्ह्यथंगु खःसां म्हसिका धाःसा पितब्यूगु मदु ।
वयेकः वंगु फेब्रुअरीइ नेपालं अस्ट्रेलिया वंगु खः । वंगु इलय् सिंगापुरया ट्रान्जिट जुया सिड्नीपाखें होर्बाट थ्यंगु खः । तास्मानियाया जनस्वास्थ्य सेवाया प्रमुख डा. मार्क भेइचं नेपालं वम्ह उम्ह ब्वनामियात सेल्फ आइसोलेसनय् च्वनेत इनाप यानागु तर पालना मयाःगु न्ह्यथंगु दु ।
फ्लुया लक्षण खनेधुंका अस्पतालय् स्वापु तःगु खःसा रोयल होर्बाट अस्पतालय् जाँच याःगु खः । वयेक शनिबाः संक्रमित जूगु सीदुगु खः । चिकित्सकं जाँचया लिच्वः मवःतले ज्याय् मवनेत धाःसा वयेकलं उगु छ्याता तकं पालना मयाःगु खः ।
वयेकःया आः रोयल होबार्ट अस्पतालय् उपचार जुयाच्वंगु दु । स्थानीय आइडियल कलेजय् अध्ययनरत वयेक नेपालं लिहाँ वयेधुंका निक्व कलेज वंगु खः । उगु कलेजय् कार्यरत सुं कर्मचारी नाप स्वापु तःगु दु मदु धका जानकारी कयाच्वंगु दु । वयेक नापं च्वनिपिं प्यम्ह व मेपिं स्वम्हसित १४ न्हुया नितिं क्वारेन्टाइनय् तयातःगु दु । स्वास्थ्य अधिकारी जहाजया विस्तृत विवरण कयाच्वंगु दु । संक्रमण नेपालं जूगु वा जहाजय् जूगु वा ट्रान्जिटय् जूगु अनुसन्धान जुयाच्वंगु दु ।
तास्मानियाय् आःतक निम्हसित कोरोना भाइरसया संक्रमण जूगु दु ।
छ्याता
फेसबुक छ्याता