संयोजक, खोकना पर्यटन महोत्सव २०२०
खोकना पर्यटन महोत्सव धका झीसँ न्ह्याकेत्यनागु दु । थ्व भ्रमण वर्ष २०२०या उपलक्ष्य खः । खोकनाया साँस्कृतिक सम्पदा झीसँ म्वाकेमाःगु दु नापं क्यने नं माःगु दु । संरक्षण, प्रवद्र्धन, विकासया नितिं नापं खोकनाय् आन्तरिक नापं बाह्य पर्यटकया आकर्षण देकेत नं थ्व ग्वसा ग्वयागु खः । थ्व महोत्सवय् नेवाः समुदाय नं न्ह्याकाच्वंगु सँस्कृति, सम्पदा, भेषभुषा, रितिरिवाज, क्यनेगु कथं थ्व न्ह्याकागु खः ।
पर्यटनयात आर्थिक श्रोत कथं विकास याना यंकेमा । थुकिया नितिं झीके दूगु मौलिक शिपया विकास याना यंकेमा । थ्व शिप नापं झी दाजुकिजा पिनिगु आर्थिक अवस्था बांलाना वनेमा । झीके दूगु दाफा, धिमे, भजन, हस्तकला, फुक्क हे पर्यटनया श्रोत खः । होमस्तेयागु तकं प्रवर्धन व विकास याना यंकेमा । थ्व महोत्वसया मू आज्जु धयागु खोकनायात पर्यटन क्षेत्र देकेगु व थनया दाजुकिजापिनिगु आर्थिक अवस्था बांलाकेगु खः ।
खोकनाय् नीगु स्वीगु हे त्वाः दु । हरेक त्वालय् माँपुच, मिसापुचयात नं थुकि ब्वति कायेकागु दु । वयेकपिं पाखे नेवाः सँस्कृति व रहनसहनया ब्वज्या यायेत्यनागु दु । अथेहे नसाज्वलं तयेगु ज्या यायेत्यनागु दु । सरसफाइया ज्या नं उकथं हे न्ह्याकागु दु । थुकिं खोकनाया धाथेंया म्हसिका बी । स्वन्हुयंकं नेवाः भेषभुषां सजे जुया वयेकःपिं झाय् त्यंगुदु । थूगु महोत्सवय् प्रष्ट रुपं मिसा सहभागिता न्ह्यब्वइ । खोकनां हे सहकारीया विकास जूगु खः । ६०० दँ न्ह्यः निसें न्ह्यानाच्वंगु परम्परा कथं आःतक नं झीके प्यंगु चिकं साः दनि । छगु हे सालं १०० म्ह मल्याक ज्या याइगु । आः सहकारीइ सेयर काये थें थनया सालय् छम्व छस्का, छतका तका उगु साः दयेकातःगु खः । थुकथं मर्मत यायेत नं सहकार्य याइ । थुकियात नं जिवन्त रुपं क्यनेगु ज्या यायेगु जुइ । सम्पदा संरक्षण्या ज्या तकं थुकिं याइ । नापं सरकारयात घचघचय् याय कथं थुगु महोत्सवं तिवः बी ।
छ्याता
फेसबुक छ्याता