संयोजक, प्रचारप्रसार कवः
छुं नं ज्या ताःलाकेत प्रचार प्रसार महत्वपुर्ण जू । आःया आधुनिक युगय् सामाजिक सञ्जालया यक्व हे ल्हाः दु । थ्व जूगुलिं फेसबुक, युट्यूबया छ्यलाबुला पाखें प्रचार प्रसारया ज्या तिव्र जूगु दु । मेगु सञ्चार माध्यमया पासापिनि नाप समन्वय याना ग्वाहालि तकं कयाच्वनागु दु । न्हापाया महोत्सव स्वयां थुगुसिया महोत्सव भव्य जुइगु आशा कयाच्वना ।
खोनाया बारे मनुतय्सं यक्व खँ सियाच्वंगु दु । खोनाय् वया स्वयाच्वंगु दु । तर थुगुसिया महोत्सवय् झीसँ मनुतयेसं मखंगु खँ त नं उजागर याना यंकेत्यनागु दु । थ्व थूगु महोत्सवया आकर्षणया विषय नं जुइतिनि । थुगु महोत्सवं लिपातकया नितिं पर्यटन विकासया नितिं ज्या याइ । छुं छुं विशेष प्रदर्शनया तयारी झीसँ यानाच्वनागु दु ।
झीसँ थुगुसि खोनाया रहनसहनया लाइभ डेमो बीगु जुइ । मस्तयेत बाह्रा तया बाह्रा पिकायेगु जुइ । अथेहे किजापुजाया किपा जक मतःसे धाथें किजा पुजा याना हे क्यनेगु जुइ । झी बाज्या पिंसं चिकं ब्वबिया हेटौंडा, भिमफेडी वनीगु । आः पुलांगु हे पहिरन पुंका पुलांगु हे लु क्यनेगु कथं चिकं कया खोनाया पहिचान न्ह्यब्वयेगु जुइ ।
जि छम्ह दाफा गुरु नं खः । दाफा या संरक्षण व विकासया नितिं तधंगु हाथ्या दु । अन्तराष्ट्रिय साँस्कृतिक अतिक्रमण जुयाच्वंगु दु झीथाय् । थौंकन्हेया युवा वर्गं परम्परागत बाजं थायेगु कम यानाहःगु दु । वयेकपिंत आकर्षण यायेगु नितिं फ्यूजन कथं यंकेमाःगु आवश्यकता नं दु । निदँय् स्वदँय् छक न्हू न्हू पुच दयेकेगु कुतः यानाच्वनागु दु । थ्व महोत्सवया नितिं नं छगु विस्कं कथंया प्याखँ तयार यानागु दु । थ्व प्याखनय् चिचिधंपिं स्वम्ह मस्त प्याखँ हुलि । अथेहे महोत्सवया नितिं हे म्ये चिनेगु ज्या तकं जूगु दु । युवा वर्गयात झीगु मौलिक बाजनय् आकर्षण मयायेगु खःसा थ्व खतराय् लाय् फु । थ्व हे जुया थ्व महोत्सवं दाफा बाजं व झी नेवाः मौलिक बाजं प्रति आकर्षण यायेगु ज्या तकं यायेगु आज्जु ज्वना च्वनागु दु ।
अथेहे किपा ब्वज्या नं यायेत्यनागु दु । स्वथाय् थज्यागु किपा ब्वज्या यायेत्यनागु दु । ३०० निसें ४०० किपात ब्वज्याय् दइ । खोनाया द्यः प्याखँ अथें पिकाय् मज्यू । द्यःपिंसं प्याखँ पिकाय् बलय् जक पिकाइ । तर थ्व द्यः प्याखँया बारे किपा ब्वज्याय् पुवंक स्वये दइ । थुगु महोत्सवय् नेवाःतय् न्हू खँ सीकेदइ । अथेहे पुलांगु खँ या जानकारी नं बीगु जुइ ।
थुगुसि झीसँ बुँपाज्या म्ये धैगु छगु नं आकर्षण कथं तयेत्यनागु दु । थ्व म्ये प्रत्यक्ष रुपं हे हायेकेत्यनागु दु ।
छ्याता
फेसबुक छ्याता