पनौतिया इन्द्रेश्वर थनया नमुनां दयेकूगु कथन
भृङ्गारेश्वर महाःद्यः नेपालय् दूपिं महाःद्यः मध्ये अति प्राचिन महाःद्यः खः । गोपालराज वंशावली नेपाः गालय् पशुपतिनाथ स्वयां न्ह्यः प्रादुर्भाव जूगु उल्लेख यानातःगु दु । भृङ्गारेश्वर शिवलिङ्ग चतुषष्ठि स्वयम्भू सिद्धज्योतिर्लिङ्ग मध्ये छगु खः । भृङ्गारेश्वर नां स्कन्दपुराण, पशुपतिपुराण आदिइ नं उल्लेख यानातःगु दु । भृङ्गारेश्वर महाःद्यः शिवलिङ्ग व थुकिया मेगु प्राचिनतम स्वरुपयात दृष्टिगत याःसा मुक्कं ५०९६ दँ न्ह्यः च्वयातःगु महाभारत ग्रन्थय् पशुपतिनाथया उल्लेख लुइकेफु । पशुपतिनाथ स्वयां न्ह्यः प्रादुर्भाव जूगु धाःसेंलि व किरातेश्वर शिवलिङ्ग तकं मनन यायेबलय् भृङ्गारेश्वर महाःद्यः न्याद्व दँ स्वयाँ पुलांगु स्पष्ट खनेदु । भृङ्गारेश्वर शिवलिङ्ग ब्राह्म सम्प्रदायया शिवलिङ्ग खः । शिवलिङ्गपूजक सम्प्रदायय् ब्राह्म सम्प्रदाय दकलय् प्राचिन कथं कयातःगु दु । ब्राह्म सम्प्रदायय् नं शिवलिङ्ग व जलहरी निगुलिं ब्राह्म सम्प्रदायया जूगु नेपालय् दूगु शिवलिङ्ग मध्ये भृङ्गारेश्वर शिवलिङ्ग छगु खः । शिवपूजक सम्प्रदायलय् दकलय् न्हापांगु ब्रम्हां पुज्याःगु धैगु हे थ्व ब्राह्म सम्प्रदायया शिवलिङ्ग खः । भृङ्गारेश्वरयात थीथी नामं म्हसिकि । भृङ्गारेश्वर महाःद्यःया नां ई कथं भृङ्गारेश्वर, भृङ्गेश्वर, भृङ्गेश, भीमभृङ्गेश्वर, भृङ्गीश्वर, सुवर्णेश्वर आदि तयातःगु दु । भृङ्गारेश्वर शिवलिङ्ग पारसमणि, स्पर्शमणि थें जुया पुजारीया कुशया अंगु लुँया अंगु कथं हिलावनिगु व घाँय् चाइपिनि ईँचा लुँया जुइगु किंवदन्ती बिचाः यायेगु खःसा अलौकिक शक्तिया महाःद्यः जूगु व पुजारीया लोभं याना उगु शिवलिङ्गगया स्पर्शय् लुँ जुइगु सत् छिन्न भिन्न जूगु जनमानसया धापु दु । सुनागुथिया न्हापाया नां सुरुंथिग्रथि, शुरगुथि आदि उल्लेख दु ।
छ्याता
फेसबुक छ्याता