थाैं पुष ११ व कन्हे १२ गते (डिसेम्बर २७, २८)य् नेपाल भारत साहित्य सम्मेलन जुइत्यंगु दु । नेपाल प्रज्ञा प्रतिष्ठानया उपकुलपति डा. जगमान गुरुङया मू पाहाँसुइ सम्मेलनया उलेज्या न्हिनय् १२ बजे जुइत्यंगु दु । येंया प्रज्ञा प्रतिष्ठानय् भारतया इन्दोरया शुभ संकल्प समुह व भारतया हुनर्सफक्स एकेदेमीया ग्वसालय् सम्मेलन जुइत्यंगु खः । शुभ संकल्प समुह सकारात्मक ज्याया प्रवर्धक समुह खःसा शान्ति व सकारात्मक बिचाःया लागि साहित्यया प्रवर्धनय् जुयाच्वंगु दु । अथेहे हुनर्सफक्स एकेदेमी धासा स्कूल, स्टाफ व पुचपिंत गुरुकुलया शिक्षा परिक्षण याकेगुलिइ सक्रिय जुयाच्वंगु दु । वैदिक कालया शिक्षायात पुनर्जागृत यायेत थूगु सस्थां कुतः यानाच्वंगु दु ।
नेपालं काठमाडौं कलेजया डा. दिप्ती स्वेता, नेपाली साहित्यकार सनत रेग्मी, मिरुटया विजय पण्डित नापं सच्चिदानन्दजीया विशेष आतिथ्य दइ । उकथं हे भारतं शुभ संकल्प समुहया छ्याञ्जे वरिष्ठ पत्रकार डा. सुनिता श्रीवास्तव, हुनर्सफक्स व पढलोर डटकमया संस्थापक तथा कार्यकारी अधिकृत प्रो संकल्प श्रीवास्तव, लायन अहिल्याबाइ क्लबया नायः डा. अर्चना श्रीवास्तव, शुभ संकल्प समुहया नायः उपेन्द्र कुमार श्रीवास्तव, दांभरी चिनमय श्रीवास्तव उपस्थित जुइत्यंगु दु ।
सम्मेलनय् “India-Nepal Literature Shared Collections” नांया सफू पितब्वज्या जुइत्यंगु दु । भारतया ५७ च्वमि व नेपाःया २०म्ह च्वमिया लेख रचना थुकि दुथ्याकातःगु दु । थूगु ज्याझ्वलय् नेपाःया २० म्ह च्वमियात सम्मान यायेत्यंगु दु । सम्मेलनय् भारतं २५ म्ह च्वमिं ब्वति कायेत्यंगु दु गुकि डा. संगीता भारुका, डा. स्वाति सिंह, डा. महिमा दुवे, डा. अल्पना आर्या, मनोरमा जोशी, मेघ्ना राइ, डा. अमरजीत कौर, डा. विजिया त्रिवेदी, अर्थभा, आर्यन, सनम दुवे आदि दुथ्याइ ।
सम्मेलनय् मनोरमा जोशी व पुचःया परम्परागत सांगीतिक हुलाप्याखँ दैसा साँस्कृतिक आदानप्रदान तकं जुइत्यंगु दु । सम्मेलनया मू आज्जु निगु देया युवा च्वमियात प्रेरणा बीगु जूगु ग्वसाखलकं न्ह्यथंगु दु ।
छ्याता
फेसबुक छ्याता