थौं बुंगद्यः जात्राया लिपांगु दिं, ५ ता इलय् भोटो क्यनि


थौं बुंगद्यः जात्राया लिपांगु दिं, भोटो क्यनिगु दिं । यलया जावलाख्यलय् थौं राष्ट्र प्रमुख न्ह्यः भोटो क्यनि ।

बुंगद्यःया खः जात्राया लिपांगु दिं थौं भोटो जात्रा नापं रथ जात्रा नं समापन जुइ । राष्ट्रपति विद्यादेवी भण्डारीया उपस्थितिइ गुठी संस्थान यलया प्रमुख शैलेन्द्र पौडेलं भोटोयात सनिलया
५ ता इलय् क्यनि । बुंगद्यःया खः वंगु बिहीबाः जावलाख्यः थ्यंगु खः ।

जावलाख्यःतक साला प्यन्हुया दिं थौं भोटो क्यनिगु परम्परा दु ।

किंवदन्ती कथं तौदहया कर्कोटक नागराजया महारानीया मिखाय् ल्वय् जुया लंके मफयाच्वनि । व इलय् वासः याके फुम्ह सु दै धका कर्कोटक नागराज मनु रुप कया माःवइ बलय् छम्ह ज्यापुं जिं फु धका महारानीया मिखा लंका बीगु व लयेताया कर्कोटक नागराजं यःगु फ्वं धाइबलय् कर्कोटक नागराजं फिनातःगु रत्नं जाःगु भोटो फ्वनि । थौं कन्हे क्यनिगु भोटो कर्कोटक नागराजं उम्ह ज्यापुयात ब्यूगु भोटो हे खः । गरिबम्ह ज्यापुं भोटो फिना जूगु व बुँइ ज्या यायेत त्वःतुगु इलय् खुया यंकुगु जुयाच्वनि । किंवदन्ती कथं बुँइ चाःह्यूवम्ह ख्याकं भोटो यंकुगु जुयाच्वन । बुंगद्यःया जात्रा स्वः वयेगु झ्वलय् ज्यापुं ख्याःयात भोटो नापं ज्वनि । तर बल्लाम्ह ख्याः नाप थःगु भोटो काय् फइमखु । ल्वानाच्वंगु इलय् थुगु भोटोया दाबी निम्हस्यां याःगुलिं प्रमाण बल्लाम्हसित बीगु खँ कथं जुजुया न्ह्यःने बीगु धका बुंगद्यःयात जिम्मा बी । प्रमाण अभावं न ज्यापुं काये फत न ख्याकं ।

थौं तक नं थुगु भोटो प्रमाण गाःपिंसं काःवा धका राष्ट्र प्रमुखया न्ह्यःने क्यनेगु यानावयाच्वंगु दु । भोटो क्यनेधुंका बुंगद्यःयात खतय् तयाः पाञ्जुपिंसं बुंगय् यंकि । थुखे चाकुबाःद्यःयात रथ नापं तंगाल यंकि ।

थौं स्वनिगलय् सार्वजनिक बिदा बियातःगु दु ।


Share on Google Plus

News: Newa News

    छ्याता
    फेसबुक छ्याता