सत्यमोहन जोशी पारसमणि हे खः - मदनसेन बज्राचार्य (किपा नापं)

सन्दर्भ : सत्यमोहन जोशीया १०० दँ बुदिँ हना

गुरु सत्यमोहन जोशीयात जिं म्हसिउ धैगु नेपालभाषा एमए दुतिय वर्षय् नेवाः लोक साहित्यया सिलसिलाय् खः । एमए पास जुइधुंका वय्कलं जिपिं एमएया न्हापांगु ब्याचयापिंत लोकसाहित्य परिषद छगु गठन या धका धयादिल । झीपिं १३म्ह मिलेजुया परिषद चाय्का, वयेकया हे छें, वयेकयात हे संरक्षक दयेका ।

वयेकनाप यक्व धैथें जि याकचा हे लानाच्वनिगु । वयेकलं भाषा, साहित्य, सँस्कृति विभिन्न पक्षया एकेदेमिक, हरेक खँ कनादी, साप न्ह्यइपुुसे च्वनिगु । उलि जक मखु वय्कयाके थीथी बिचा दइगु । गथेकि लेखनाथ पौडेलपिंत वय्कपिंसं जंक्व तकं यानादिल । अथेहे जित नं थीथी कथंया प्रेरणा वल । लोकसाहित्य सम्बन्धि विश्लेषणत अध्ययन यायेगु, अथवा छुं नं ज्याझ्वः गथेयाना न्ह्याका यंकेगु धैगु बिचा यायेगु वय्कपाखें सेका कया ।

सत्यमोहन थें जाम्ह मनु विरलै दइ धैगु भावना दैगु । आः जिं नं छुं यायेमा धका मति तया जिं नं सत्यमोहन जोशीया जन्मदिन हने धका शुरु याना । सायद वयेक ६९ वर्ष दुबलय् निसें नियमित वयेक:या बुदीं हना । उबलय् जिं संकलन यानातयागु लोहसाहित्यया कृति नं पिकायागु खः । ७५ वर्ष दुबलय् वय्कयात अभिनन्दन यायेगु धका झीसँ राष्ट्रिय सभागुहलय् केदारमान व्यथितयात मूपाहाँ दय्का भव्य रुपं ज्याझ्व: याना । तर व ज्याझ्वलय् आर्थिक हिनामिना जुल।  थ: पासापिं जूगुलिं जि तसकं निराश जुया।  निदँ तक छुं ज्याय् संलग्न मजुया ।

लिपा जंक्व यायेगु ई वल ७७ वर्ष थ्यं बलय् । जिं लेख छपु छु ख पत्रिकाया नितिं बिया तर ललिता धैगु पत्रिकाय् पिहाँ वयाच्वन । उकि पिहाँ वय्धुंका यलय् च्वम्ह अमरमान जोशीं फोनयाना हल । सत्यमोहन जोशीया जन्क्व भव्य रुपं यायेमाल धका जित धयादिल । जि न्हापाया ज्यां निराश जुयाच्वनागुलिं थुकि ब्वति मकायेगु खँ न्ह्यथना । तर वयेकलं जिद्दी यानादिल । अले वय्क नापं म्हाम्हा धाय्क हे जंक्वया ज्या नं भव्य रुपं हे जुल । उगु जंक्व धुंका वयेकयात विरातनगरय् नं भव्य रुपं हे नगरपरिक्रमा जुल । जंक्व धुंका पोखराया नेवाः खलः कास्कीयात गोविन्द सिरपा बिया न्येय् द्व तकाया । थ्व दामं पोखराय् भवन दयेकेत पुर्वाधार दत ।

अथेहे नेपालभाषा एकेडेमि दयेकेगुलि वयेकया तधंगु भुमिका दु । दः वयेकलं २०४२ सालय् धयादिगु नेपालभाषाया एकेडेमि देकेमानी धका । जिं गुलि कुतः यानाच्वना तर मनुतयेसं चासो क्यनेमफुत धका  वयकलं कनादिगु । लिपा वयेकलं नेपालभाषा एकेडेमि देकातुं त्वतादिल ।

वयेकयात विभिन्न कथं आरोप बीपिं मनुत नं दु, मदुगु मखु । तर वयेकलं छु बिचा याइ व याना तुं त्वति । अकें केदार मान व्यथितं यक्व धैथें स्टेजय् धयादि सत्यमोहन जोशी धैम्ह पारस मणि खः । वं थिलकि चा हे लुँ जुइ धयादि । जिं अध्ययन यानागु व वयेकनापया संगतं धाथें सत्यमोहन पारसमणि हे खः । वयेकलं यानादी थें सुनां याये फइमखु । वयेकलं पिथनादिगु कृतिया धल स्वलकि सीदु । म्यूजियम देकादिल, नाचघर देकादिल, चित्र संग्रहालय देकादिल, पुरातत्वया सुरुवात यानादिल,  साँस्कृतिक विभागय् ध्यबा हे मदुसां सिंहदरबारय् लछितक भव्य साँस्कृतिक ज्याझ्व यानादिल, ध्यबा हे मदय्कं प्रचलित नेपाल लिपिया सफु प्रकाशन यानादिल ।

वयेक उलि नवानादिमखु तर छु बिचा यात व थ्याक्क या हे याइ । अथे जुगुलिं सत्यमोहन द्यःया बरदान हे खः । वयेकया कपालय् हाकुगु ति छगः दु, व ति साप महत्वपुर्ण धका जिं न्ह्याबलें धायेगु । आः सछि दँ थ्यंका तक नं वय्कलं यानाच्वनादिगु योगदान नेवाः तय् गौरव जक मखु नेपाःया नितिं हे साँस्कृतिक गौरव खः । वयेकया अनुशरण जक यायेफत धासा हे झीसँ छुं यायेफइ । वयेकयात सछि दँया अभिनन्दन यायेत्यंगुलिं वयेकयात यक्व यक्व भिन्तुना अले ज्याझ्वः यायेत्यंगु समितियात नं यक्व यक्व सुभाय् ।

तिकिझ्याः वाःपौया थुगुसिया ल्याः, सत्यमोहन जोशी विशेषांकया नितिं सत्यमोहन जोशीया जिवनी लेखक, साहित्यकार, अन्वेशक मदनसेन बज्राचार्य नापया खल्हाबल्हाया आधारय्।  

ने.सं. १११४ यँलागा: ४ (बि.सं २०५१ आश्विन ८गते) शनिवार : राष्ट्रिय सभागृहस सार्वजनिक रुपं संस्कृतिविद भाषारत्न सत्यमोहन जोशीजुयात हनेज्याया लुमन्ति किपा । (मदनसेन बज्राचार्यया फेसबुक)

















जंकु : ने.सं.१११८ पोहेलाथ्व २ (२०५४ पौष १६गते) किपा (मदनसेन बज्राचार्यया फेसबुक)

















मदनसेन बज्राचार्य 



Share on Google Plus

News: Newa News

    छ्याता
    फेसबुक छ्याता