नेवाः देय् दबुलिइ आर्थिक हिनामिना दु : अंजिता खड्गी


नेवाः देय् दबुलिइ आर्थिक हिनामिना जूगु दु । निदँ दुने जुगु आर्थिक अपचलनया बारे सकलसित सीकेत नेवाः देय् दबुया केन्द्रिय मू दाँभरी अंजिता खड्गीं पत्रकार सम्मेलन याना थुकिया जानकारी बियादीगु खः । जातीय खलःतय्गु समुपस्थितिइ आर्थिक हिनामिनाया उलेज्या मूदाँभरी खड्गीं यानादीगु खः । नेवाः देय् दबुलिइ नायः नरेश ताम्राकारया हालिमुहालि जूगु मूदाँभरीं द्वपं बियादीगु दु । बिधान कथं झिद्व तकया आर्थिक ग्वाहालि नायःया ल्हातय् दूगु व नायः नं थः सतीपिं व थः यथे आर्थिक गतिविधि याःगु वय्कलं न्ह्यथनादिल । चिचिधंगु ज्याझ्वलय् तकं कमिसन नयेगु यानावयाच्वंगु वय्कलं खुलासा यानादिल । समय्बजि नकेगु, बाजं इनेगु निसें ग्वाहालि ध्यबाय् तकं कमिसन नयाच्वंगु दाँभरी खड्गीं द्वपं तयादिल ।

सचिवालय बैठकया खँ कुलाः वय्कलं गुबलें कोरम मगाःगु व आर्थिक विषयलय् सहलह हे मजुगु न्ह्यथनादिल । बैठकया माइन्यूट तकं गुबलें मजूगु व महासचिवं बैठक धुंका माइन्यूट देका साइन याकिगु न्ह्यथादिल । बैठक सिधय्का चेकय् साइन यायेत जक थःत जानकारी वइगु मूदाँभरीं न्ह्यथनादिल । थःम्ह सचिवालय नं पास याना न्ह्याः वनेगु बारम्बार धयां नं नायःया चित्त बुझे मजूगु वय्कलं न्ह्यथनादिल । हिसाब पारदर्शी यायेमागुलि वय्कलं बः बियादिल ।

धनगढीइ फागुन २४ गते जुगु बैठकय् वनेत छगु लखया चेकय् साइन याय्मागुलिइ वय्कलं असन्तुष्टि प्वंकादिल । व स्वयां न्ह्यः दैलेखय् ९७ द्व तका सत्कारया नितिं धका खर्च जुगुलिइ नं वय्कलं असन्तुष्टि प्वंकादिल । समग्र नेवाःतय्के ल्ह्वंगु ध्यबा थुकथं हिनामिना यानाच्वंगुलिं संस्था म्वाकेत व निकासया नितिं पत्रकार सम्मेलन याय्मागु खड्गीं न्ह्यथनादिल ।

वैठकय् नेपालभाषां खँ ल्हायेमा धासां खँ मिले मजूगु व न्वकू चन्द्रलालं थःत नेपालभाषा अनिवार्य मखु धागुलिइ दुख प्वंकादिल ।

दबुया छें दनेत थम्हं पीद्व छ्याञ्जे सत्यनारायण डंगोलयात बियागु तर उकिया हिसाब तकं मक्यंगु वय्कलं न्ह्यथनादिल । थम्हं हिसाब फ्वनागु दबुयात पारदर्शीयायेत जक जूगु व सुयातं व्यक्तिगत आक्षेप मयानागु न्ह्यथनादिल ।

देय् दबुलिं नेवाः आदिवासी खः धका ब्वनामितय्त सहुलियतय् सिफारिस यायेमाःगुलिइ प्रति व्यक्ति न्यास तका कयावयाच्वंगु दु । आर्थिक संकलन अप्वया राजनीति जुगु खड्गी न्ह्यथनादिगु दु ।

वंगु २०७४ सालय् जेठ १४ गते खड्गी केन्द्रिय दुज मनोनित जुयादीगु खः । वयाँ लिपा मू दाँभरी कथं मनोनित जुयादीगु खः । नकतिनि हे धनगढीइ जुगु बैठकं पद हेरफेर याना छ्याञ्जे शान्ति श्रेष्ठयात मू दाँभरी कथं नियुक्त याःगु व आर्थिक हिसाब लःल्हाय्त पौ पाखें जानकारी वःगुलिं खड्गीं पत्रकार सम्मेलन याना थःत पदं लिकागुया असन्तुष्टि प्वंकादीगु खः । विधान कथं पदं लिकाय्त थःके स्पष्टिकरण नं मकाःगु वा भ्रष्टाचार यात धका द्वपं तकं मदुगुलिं लिसः पौ तकं थम्हं छ्वयागु वय्कलं न्ह्यथनादिल । दबुयात म्वाकेत थःम्ह अभियान हे न्ह्याकेगु धासें वय्कलं दबु म्वाकेत पुनर्गठन हे याय्मागु न्ह्यथनादिल । खड्गी नेपाल खड्गी सेवा समितिया केन्द्रिय नायः तकं जुयादि ।

Share on Google Plus

News: Newa News

    छ्याता
    फेसबुक छ्याता

0 comments:

Post a Comment