छुं नं कथंया धेधेबल्ला उत्कृष्ठ मनु ल्ययेज्याया नितिं जुयाच्वनि । धेधेबल्लाया थःथःगु हे आज्जू दयाच्वनि । थःथःगु हे स्वार्थ दयाच्वनि । निस्वार्थ तरिकां धेधेबल्ला पक्का नं जुयाच्वनि मखु । तर स्वार्थ धायेवं अत्याचार पक्का नं याय् मज्यू ।
गायन कला विकासया नामय् नेपाल गोल्डेन आइडल सिजन ६ जुयाच्वंगु दु । एनटिभीप्लस नापं गोल्डेन स्टार टिभी अनलाइन च्यानलं प्रशारण जुयाच्वंगु थुगु धेधेबल्लाखय् नं थथे हे खनेदत । थःगु कला पितब्वया सलंसः मध्ये टप ६ थ्यनेत ताःलाम्ह बाल प्रतिभा स्रजल महर्जन नापं मेपिं प्रतिस्पर्धीप्रति आयोजकं ५०० स्वयां अप्व मूया टिकट मीमाःगु व ध्यबा संकलनयाय् माःगु दबाव ब्यूगु, प्रतिस्पर्धीयात दुब्र्यवहार याःगु नापं यें, चितवन, इटहरी नापं थीथी च्यागु थासय् जुगु सांगीतिक यात्राय् मनकुगु, द्यनेगु व्यवस्था मयाःगु नापंया धेधेबल्लाया हाकुगु ब्वः पिंहावःगु दु । सांगीतिक यात्राया दौरान गनया प्रतिस्पर्धी खः उगु थाय्या ज्याझ्वःया फुक्क ब्यवस्थापन व आवश्यकता पूर्ति प्रतिस्पर्धीं थःम्हं याय्माःगु शर्त तःसेंलिं प्रतिस्पर्धि स्रजल महर्जनया बाः सुरोज महर्जनं पत्रकार सम्मेलन याना हे थःत जूगु दबाब व चिन्ता न्ह्यब्वयादिल ।
नेपालभाषाया मचा म्ये धाल जित नेवाःया गायक स्रजल सुरशाला आइडलपाखें जनमानसय् पिलूवःगु खःसा प्रतिभा अझ विकास जुइधका हे अध्ययनरत ब्वनेकुथि ज्ञान निकेतन स्कुलया प्रस्तावय् थुगु धेधेबल्लाखय् ब्वति काःगु खः । प्रतिभा विकासया नामय् यक्व हे दुख ब्यूगु व लिपांगु इलय् सहनशक्ति स्वयां अप्व हे अन्याय जूगुलिं थःपिंसं धेधेबल्ला त्वतेत बाध्य जुगु महर्जनं न्ह्यथनादिल ।
ग्वसा खलकं रियालिटी शोया नामय् ध्यबाः जक नयेत स्वइगु व शारिरीक नापं मानसिक तनाव बीगु प्रवित्तिया नांगां प्याखँ थुकिं सीकेफइ । अभिभावकपिनि मनय् असन्तुष्टि, पीडा दुसां थः मस्तय्गु भविष्यया नितिं हे अन्यायविरुद्ध सः ल्व्हने फयाच्वंगु मदु । थुकिया हे लवः ग्वसा खलकं कयाच्वंगु दु । लिपांगु इलय् टिकट मी फूगु हे त्याय् बुइया गणना जुयाच्वंगु दु । हानं टिकट मिया त्याइगु नं ग्यारेन्टि मदइगु थज्यागु धेधेबल्ला ठगी मखुला ? थ्व खँ पक्का नं बिचा याय् बह जू ।
0 Comments:
Post a Comment