ज्यापु संस्कृति विकास काेषं दँय्दसं गुरूपुन्हीया लसता लाकाः येँ देय्या परम्परागत ६३ त्वाःया गुरूपिन्त हनेगु ज्या न्ह्याकावयाच्वंगु दु । काेषपाखें दँय्दसं यःमरि पुन्ही खुनु राष्ट्रिय ज्यापु दिवस हनावयाच्वंगु दुसा थुगुसी १५ क्वःगु राष्ट्रीय ज्यापु दिवसया पाःब्व धर्मचक्र तःननि खलः त्वाः गुथियात लःल्हात । पाःब्वकथं खलःयात दसिपाै व छगू लख तकाया चेक लःल्हाःगु खः ।
अाैपचारिक ज्याझ्वः स्वयां न्ह्यः येँया परम्परागत ६३ त्वाःया गुरूपिन्त नेवाः परम्पराकथं ख्यें सगं बियाः पुजा याःगु खः ।
धर्मचक्र तःननि खलःपाखें मंगलधुनलिसें थीथी धुनं ज्याझ्वः न्ह्यइपुगु खः ।
ज्याझ्वलय् नुगः खँ तयादिसें ज्यापु महागुथि नेपाः केन्द्रीय तयारी समितिया नायः राजभाइ जकःमिं जिल्ला प्रशासन कार्यालय येँय् तत्कालीन श्री ज्यापु महागुथि नेपाः व ज्यापु महागुथि छगू हे जुयाः ज्यापु महागुथि नेपाः दर्ता जुइधुंकूगु खँ कनादिल । वय्कलं ज्यापु जातिया राष्ट्रिय संगठन ज्यापु महागुथिया थःगु हे भवन मदुगुलिं येँ मनपालिसे थुकिया निंतिं सहलह यानागु व मनपां भवन दय्केत जग्गा दत धाःसा अार्थिक ग्वाहालि बीगु बचं ब्यूगु खँ नं न्ह्यथनादिल ।
काेषया संस्थापक संस्था मध्ये छगू नारायण परिवार क्लबया नायः प्रचण्डमान बज्राचार्यं क्लबपाखें काेषया ज्याकू न्ह्याकेत छकू क्वथा उपलब्ध याका वयाच्वनागु व माल धाःसा मेमेगु कथं नं ग्वाहालि याय्त तयार दु धयादिल ।
पाःब्व लःल्हाना काःगु धर्मचक्र तःननि खलःया नायः तीर्थनारायण महर्जनं १५ क्वःगु राष्ट्रिय ज्यापु दिवस तःजिक हनेगु निंतिं सकसियां ख्यलं ग्वाहालि यानादीत इनाप यानादिल । सकसियां ग्वाहालि मदय्क राष्ट्रिय ज्यापु दिवस सफल मजुइगु बिचाः वय्कलं प्वंकादिल ।
थथे हे १४ क्वःगु राष्ट्रिय ज्यापु दिवस समाराेह समितिया सहसंयाेजक ज्ञानु काजी डंगाेलं थगुनेया राष्ट्रिय ज्यापु दिवस तःजिक ताःलाकेत ग्वाहालि यानादीपिं सकसितं सुभाय् देछानादिल ।
ज्याझ्वःया सभापतिलिसें काेषया नायः मंगलकृष्ण सिंहं यःमरि पुन्ही खुनु हना वयाच्वनागु राष्ट्रिय ज्यापु दिवस ज्यापुतय्गु जक मखसें नेवाःतय्गु हे दिवस जूगुलिं थुकियात तःजिक हनेत सकसितं इनाप यानादिल ।
ज्याझ्वलय् लसकुस यानादिसें काेषया न्वकु सन्तकुमार महर्जनं गुरूपिं विनाः त्वाःया संस्कृति परम्परा ल्यंके मफइगु जूगुलिं वय्कःपिंसं तन मन धन बियाः गुगु सेवा यानादीगु दु उकिया हे कदरकथं काेषपाखें थ्व चीधंगु ज्याझ्वः ग्वसाःग्वयाः गुरूपिन्त हनागु खँ कनादिल ।
ज्याझ्वलय् काेषया दुजः सत्यनारायण डगाेलं काेषया सुदृढीकरणया निंतिं भावी याेजना व उकिया कार्यविधि न्ह्यब्वयादीगु खःसा वय्कलं हे हनेज्या सुथांलाकेत ग्वाहालि यानादीपिन्त सुभाय् नं देछानादीगु खः ।
ज्याझ्वः काेषया मूछ्याञ्जे रमेश महर्जनं न्ह्याकूगु खः ।
पाःब्व लःल्हानाकासें धर्मचक्र तःननि खलःया नायः तीर्थनारायण महर्जन |
पाःब्वया चेक लःल्हानाकासें । |
0 Comments:
Post a Comment