नेपाःया घिमिरें भारतय् उपाधी त्याकल


येँ, नकतिनि भारतय् क्वचाःगु लिटिल अस्थेटिक्स किड्स फेसन रनवे व टिन एस्थेटिक किड्स फेसन रनवेय् ब्वति काःपिं नेपाःमि प्रतिस्पर्धीपिं उपाधी ज्वनाः नेपाः लिहाँ वःगु दु ।

आइतवाः भारतय् कामाक्षं ग्वसाःग्वःगु लिटिल एस्थेटिक्स किड्स फेसन रनवेय् नेपाःया साइब्या घिमिरें उपाधी त्याकेत ताःलात । न्यागू देसं ब्वति काःपिं ५२ म्ह प्रतिस्पर्धी दथुं घिमिरे त्याकामि जुइत ताःलाःगु खः । थुकथं हे प्रतिस्पर्धाय् नेपाःया हे मेम्ह प्रतिस्पर्धी सुरेन्द्रकुमार श्रेष्ठ सेकेन्ड रनर अप जुल सा लिटिल विधापाखे हे नेपाली प्रतिस्पर्धी नमन मित्तलं बेस्ट फोटोजेनिक टाइटल त्याकल ।

छक्वलं जूगु निगू इभेन्टय् न्याम्ह नेपाःमि प्रतिस्पर्धीं उपाधीलिसें मेमेगु विधाय् नं टाइटल त्याकूगु दु । टिन एस्थेटिक्स किड्स फेसन रनवेय् नेपाली प्रतिस्पर्धी प्रेजु कायस्थ ल्यू लात । उकी हे नेपाःपाखें प्रतिस्पर्धाय् ब्वति काःम्ह महिमा बज्राचार्यं थ्व विधाय् ट्यालेन्टेड पर्सनालिटिज जुइत ताःलात ।

वंगु वैसाखय् रेडियन्ट ईभेन्ट म्यानेजमेन्ट एजेन्सीया ग्वसालय् येँय् जूगु लिटिल प्रिन्स एन्ड प्रिन्सेज नेपाल व टिन प्रिन्सेज डिभाया त्याकामिपिसं भारतय् किड्स फेसन रनवे प्रतिस्पर्धाय् ब्वति काःगु खः । नेपाःया त्याःपिं कासामिया ल्याखं न्याम्ह प्रतिस्पर्धीपिन्त रेडियन्ट ईभेन्ट म्यानेजमेन्टं भारतय् थुगु कासाय् ब्वति काःगु खः । नेपालं प्रतिस्पर्धाय् ब्वति काःपिं न्याम्हं प्रतिस्पर्धी खालि ल्हातं लिहाँ मवः ।

भारतय् जूगु कासाय् नं नेपाली प्रतिस्पर्धीपिन्त नेपाःया ईन्टरनेशनल कोरीयोग्राफर लिसें रेडियन्ट ईभेन्ट म्यानेजमेन्टका फाउन्डर डाइरेक्टर राज फैजुं कोरीयोग्राफी याःगु खःसा प्रतिस्पर्धीपिनि ड्रेस डिजाइन श्रीषा बैदार फैजुं याःगु खः । थुकथंया कासां मिस वल्र्ड थुज्वःगु कासाया निंतिं आधार दय्का यंकीगु धासें इन्टरनेशनल कोरीयोग्राफर राज फैजुं कनादिल ।

‘थौंतक नेपाःया ब्यूटि पेजेन्टया विजेतात तप्यंक अन्तर्राष्ट्रिय प्रतियोगीताय् सहभागीता क्यं वनाच्वंगु दु । आः चिचीधिकःपिं किजाकेहेँपिंसं नं थुकथं अन्तर्राष्ट्रिय प्रतियोगीताय् ब्वति काः वनीगु लकस ब्वलंगु दु । अले थौं थुकथं अन्तर्राष्ट्रिय प्रतियोगीतातकं त्याकाः नेपालं भविष्यय् मिस वल्र्डया उपाधी नं त्याकेफु धइगु प्रमाणित जूगु दु’ फैजुया धापुदु ।

कासाय् नेपाल व भारतलिसें दुबई, सिंगापुर व मलेसियां यानाः ५२ म्ह प्रतिस्पर्धीपिनि ब्वति दुगु खः ।

Share on Google Plus

News: तिकिझ्याः न्यूज

    छ्याता
    फेसबुक छ्याता