नेवाःसनातनी धर्मावलम्बितय् गुरु पुरोहितया रुपं म्हस्यूपिं राजोपाध्यायतय्गु कुसा संगठन राजोपाध्याय समाजया जिल्ला समन्वय समितित गठन जूगु दु । समाजं स्वनिगःया स्वंगुलिं शहरय् जिल्ला समन्वय समिति गठन याःगु खः । थ्व हे झ्वलय् थौं समाजं जिल्ला समन्वय समिति, येँ गठन याःगु दु । थौं समाजं येँया दुजःपिनिगु मुना ज्याझ्वःया ग्वसाः ग्वयाः विरु सुवेदी राजोपाध्यायया कजिसुइ न्हय्म्ह दुजःया येँ समिति गठन याःगु खः । येँ जिल्ला मुनां सर्वसम्मत रुपं ल्यःगु समितिइ छ्यान्जे सुजित राजोपाध्याय व दांभरिं विभुषा राजोपाध्याय च्वनादीगु दु । अथे हे, दुजलय् विद्या राजोपाध्याय, राजीव राजोपाध्याय, लूजः राजोपाध्याय व सुरभी राजोपाध्याय च्वनादीगु दु ।
ज्याझ्वलय् नव्य न्यायाचार्य उपेन्द्रभक्त सुवेदी (गोविन्द भक्तानन्द राजोपाध्याय), अर्थविद् लक्ष्मणराज राजोपाध्याय, नापी विभागया पूर्व महानिर्देशक रविनकाजी शर्मा राजोपाध्यायं समाजयात बल्लाकेत सामाजिक रुपं संगठित जुयाः शैक्षिक, आर्थिक रुपं नं सक्षम दयेका यंकेमाःगु खँय् बः बियादिल । व स्वयां न्ह्यः समाजया ख्वप मुनां जिल्ला समन्वय समिति ख्वप व यल मुनां जिल्ला समन्वय समिति यल गठन यायेधुंकूगु दु । ख्वप मुनां वन्दना शर्मा राजोपाध्यायया कजिसुइ ९ दुजःया समिति सर्वसम्मत ल्यःगु खः ।
समितिइ माधुरी शर्मा राजोपाध्याय छ्यान्जे, विजया शर्मा राजोपाध्याय दांभरिं च्वनादीगु दुसा गिरीश शर्मा राजोपाध्याय, स्वस्तिका राजोपाध्याय, चेतनराज राजोपाध्याय, रसिक राजोपाध्याय, मिला राजोपाध्याय व प्रीतमराज राजोपाध्याय दुजः दु । अथे हे यल मुनां उद्धव आचार्य राजोपाध्यायया कजिसुइ न्हय्म्ह दुजःया समिति सर्वसम्मत हे ल्यःगु खः । यल समितिइ धाःसा छ्यान्जेय् त्रिलोचन राजोपाध्याय, रुविना राजोपाध्याय दांभरिं, दुजलय् महेशबाबु राजोपाध्याय, विजेश राजोपाध्याय, बुनु शर्मा राजोपाध्याय व नीरज राजोपाध्याय च्वनादीगु दु ।
समाज गठन जूगु छगू दशक पुलेधुंकूगु अवस्थाय् न्हूगु ढंग व गतिं समाजयात न्ह्याका यंकेत जिल्ला समन्वय समिति गठन जूगु नायःअमरराज शर्मा राजोपाध्यायं धयादिल । समाजयात बल्लाकायंकेत समाज अझ सशक्त ढंगं न्ह्याःवनीगु नायः राजोपाध्यायया धापू खः ।
0 Comments:
Post a Comment