नेपाल राष्ट्रिय खड्गी समाजया निक्वःगु अधिवेशनं मानबहादुर खड्गीया नेतृत्वय् ४१ दुजःया न्हूगु कार्यसमिति ल्यःगु दु । वाङमय शताब्दि पुरुष संस्कृतिविद् डा. सत्यमोहन जोशीं उलेज्या या:गु ज्याझ्वलय् वय्कलं नेपालय् नेवाःया म्हसीका न्ह्यब्वयेगुलिइ खड्गी समुदायया तःधंगु योगदान दुगु न्ह्यथनादिल ।
अथे हे पाँहा कथं झायादिम्ह येँ महानगरपालिकाया उपप्रमुख हरिप्रभा खड्गीं देय् व राष्ट्रया लागिं पूर्णरुपं समर्पित जुयाः न्ह्याःवनेत समाजया न्हूपिं पदाधिकारीपिन्त इनाप यानादिल । ज्याझ्वलय् प्रतिनिधि सभा सांसद जीवनराम श्रेष्ठ, प्रदेश सभा सांसद राजेश शाक्यलिसें थीथी संघसंस्थाया प्रतिनिधिपिनिगु उपस्थिती दुगु खः ।
ज्याझ्वलय् थीथी ख्यलय् योगदान ब्यूपिं खड्गी समाजया च्याम्ह व्यक्तित्वपिन्त हंगु दु । वातावरणीय विज्ञान विषयस न्हापा लानाः ‘ख’ श्रेणीया नेपाल विद्याभूषण कायेत ताःलाःम्ह आरती खड्गी, दुर्गम हिमाली लागाय् मस्तय्त शिक्षा बीत योगदान बिया वयाच्वंम्ह विनोद शाहि, विश्व शारिरीक सुगठनय् थीथी पदक त्याकेत ताःलाःम्ह राजेश शाहि, भारात्तोलन ख्यलय् सक्रिय जुयाः देशय् विदेशय् थीथी पदक त्याकेत ताःलाःम्ह अशोक शाही, नेपाल यातायात व्यवसायी महासंघया केन्द्रीय उपाध्यक्ष ऐनकुमार शाही, यातायात व्यवसायी महासंघया ३ नम्बर प्रदेशया उपप्रमुख त्रिरत्न नेवाः, राजीव गान्धी युनिभर्सिटी अफ हेल्थ साइन्स कर्नाटका बैंगलोरं फिजियोथेरापीइ स्नातक व स्नातकोत्तरय् स्वर्ण पदक त्याकुम्ह रीमा शाही व न्हू दिल्लीं चार्टर्ड अकाउन्टेन्ट डिग्री प्राप्त याम्ह श्वेता शाहीयात ज्याझ्वलय् हंगु खः ।
ज्याझ्वः न्ह्यः नाय्खिं लिसें थीथी बाजं थानाः सांस्कृतिक वसतय् र्याली पिकाःगु खःसा र्यालीं येँया पुलांगु वस्तीया थीथी लागा चाःहिलाः सान्ति निकुन्ज मा बि भौक्यबय् थ्यंगु खः ।
0 Comments:
Post a Comment