फुक्क वर्गया संकिपा : वसन्त ऋतु थौं क्यनिगु


समाजय् बिकृति दु । पारिवारिक समाजय् झी म्वानाच्वना । तर थ्व हे परिवारय् गुलि अन्याय दु गुलि अपराध दु । मनुयात छकय् याना म्वाइपिं, मनु स्यंका मोज काइपिं थ्व समाजय् गुलि दु । सोझा सिधापिंत धों लाना लखय् मिखा कंका थः प्रतिस्थित जुया धनवान जुया ख्वाः ब्वयाच्वपिनिगु कुरिति उलेगु कुतः खः नेपालभाषाया संकिपा बसन्त ऋतु । पिडितपिनिगु बाखँ खः बसन्त ऋतु । थ्व सँकिपा स्वय् धुंका समाजय् आमुल ह्यूपा वइगु सँकिपा निर्देशक पवन जोशीया विश्वास दु । न्हू न्हूपिं कलाकारया बाहुल्य दुगु थुगु सँकिपा नमुना कथं जुइगु व आः न्हूपिं स्टारया जन्म जुइगु सँकियाया परिकल्पनाकार नापं निर्माता रामकृष्ण धिनांया उद्घोष दु ।

धुँ दय् प्रोदक्सनया न्हापांगु न्ह्यब्वया थुगु सँकिपा समाजया खायुगु चित्रण जुगु वय्कपिनिगु छसः दु । १५गु लखया लगानिइ निर्माण जुगु थुगु सँकिपा काल्पनिक जुसां नं यथार्थपरक जुगु वय्कपिनिगु न्ह्यथना दु । किशोर चिपालु, राजेन्द्र महर्जन, अनु महर्जन व शोभा महर्जनया मू भुमिका दुगु थुगु सँकिपा लोभ व लालचया प्याचा व स्वार्थं थःगु नापं मेपिनिगु परिवार गुकथं स्यनि क्यनेत स्वःगु दु ।

फागुन २६ सनिबार, नाचघरय् च्यारिति शो क्यनेत्यंगु थुगु सँकिपाया ११ बजे व न्हिनय् २ बजेया निगु शो क्यनेत्यंगु दु । नेपालभाषाया सँकिपाया लगानी ल्वने थाकुगुलिं थुकथं च्यारिति शो क्यने माःगु निर्माता धिनां दुख क्यना दिल । वय्कलं न्ह्यसः न्यनादिल नेपालभाषाया सँकिपा बांलागु जुसां नेवाः तय्सँ मस्वसा सुनां स्वइ ?

Share on Google Plus

News: Newa News

    छ्याता
    फेसबुक छ्याता