पेजथ्री नेपालभाषा बाःछिपौया ग्वसालय् चेज बूदिंया भिंतुना म्ये कासा Budinya Bhintuna Cover Song Competition जुइ त्यंगु गायक नापं संचारकमि सुरज बिर बज्राचार्यं घोषणा यानादिगु दु ।
थुगु म्ये मंगलधुनय् जुगल डंगोलया संगीत संयोजनय् सुरजवीर बज्राचार्यं च्वयाः हालाः पिथंगु खः ।
गोल्मा कम्पनी प्रा.लि., आर्टोम्यूज रेकर्डिङ स्टुडियो व आपालंसिगु ग्वाहालिइ थुगु कभर म्ये कासा यायेत्यंगु खः । थुगु कासाय् कासामिपिन्सं थःगु सलय् बूदिंया भिंतुना म्ये हालाः YouTube वा Facebook य् अपलोड यानाः लिङ्क यात फेसबुक पेज Budinya Bhintuna Mye Kasa वा तप्यंक (https://www.facebook.com/Surajbir123/) य् अपलोड यायेमा । उकी आधिकारिक नां, थाय्बाय् व फेसबुक आइडी नं दुथ्याकादीमाः । इफेक्ट मदुगु म्ये दुथ्याकेमागु लिसें नियम अखः गुगुं म्ये दुथ्यात धाःसा उकियात थुगु कासां पितनेगु ग्वसा खलकं न्ह्यथंगु दु । बूदिंया भिंतुना म्येया लिरिकल (शब्द सहित) भिडियो व काराओके ट्रयाक थन दु ।
ट्रयाक बाहेक गुगुं बाजं थानाः हाला रेकर्डेड भिडियो अपलोड जूगु नं मान्य जुइगु ग्वसा खलकं जानकारी ब्युगु दु । स्वम्ह जज दुगु प्यानलपाखें दकले बांलाक बूदिंया म्ये हालादीम्ह छम्हसित ल्यय्गु नं घोषणा जुगु दु । सिरपाकथं जुगल डंगोलया लय् व संगीत संयोजनय् नापं सुरजवीर बज्राचार्यया च्वसां पिज्वःगु म्ये छपु रेकर्डिङया ह्वताः बीत्यंगु दु । नापं चेज डिजिटल लिड टेलिभिजन छगः नं देछाइगु घोषण जुल । छम्हसिबें अप्वः बांलापिं म्येहालामिपिं दःसा उत्कृष्ट १०म्हसिगु एल्बम तयार जुइकथं म्येहालामि ल्यय्ज्या जुइगु नं ज्याझ्वलय् जानकारी ब्यूगु दु ।
थौं घोषणा जूगु कासाया लिंपागु ई माघ ८ (वसन्त पञ्चमी) गते तक जुइ । थुगु ई दुने म्ये पोष्ट यानादीफइ । कासाया अन्तिम दिन लिपा सिरपा घोषणा यासें सिरपाः देछायेगु छगू तःजिगु ज्याझ्वः नं यायेगु ग्वसाः खलकं न्ह्यथंगु दु ।
म्ये हालेया नितिं म्येग्व थुकथं दु :
लय्ता जि अति छंगु जन्मदिं थौं
मनतुंगु पूवनेमा भिंतुने
लसताया स्वां ह्वय्मा पलाः छं तःथाय्
लुँआखलं कर्म छं च्वय्फय्मा
मां नेपाःयात संसारय्
श्रद्धा ब्वलंक छं ब्वय्फय्मा
लय्ता जि अति छंगु जन्मदिं थौं
मनतुंगु पूवनेमा भिंतुने
वँवंथाय् छंगु जयजयकार जुइमा
सुद्र्यः थें जः थीमा छंत भिंतुने
वँवंथाय् छंगु जयजयकार जुइमा
सुद्र्यः थें जः थीमा छंत भिंतुने
ख्युंथाय्तकं छंत लुफिं महाय्मा
तिमिलाजः न्ह््यः न्ह््यः सदां खय्मा
दुःखया किचलं गबलें मकय्मा
मिखां ख्वबि सुखय् जक हाय्मा
मदुपिं मफुपिनिगु तिबः छ जुइमा
वँवंथाय् लकस झःझः धाय्मा
लय्ता जि अति छंगु जन्मदिं थौं
मनतुंगु पूवनेमा भिंतुने
जातः क्यना द्यःद्यःपत्तिं द्यके वना
सगं सुवाः बिया धौबजि इना
जातः क्यना द्यःद्यःपत्तिं द्यके वना
सगं सुवाः बिया धौबजि इना
सकलें सकलें गुलि जक लय्ता
सदां सकभनं न्हिला थ्वय्के फय्मा
तःधंम्ह सकसिया यःम्ह जुयाः
नुगः नुगलय् सदां च्वनेफय्मा
कुंकुलांया सकलें नेपाःमि
छप्पं छवाः छधी याय्फय्मा
लय्ता जि अति छंगु जन्मदिं थौं
मनंतुंगु पूवनेमा भिंतुने
नुगः नुगलय् च्वनेफय्मा भिंतुने
सुद्र्यःथें जः थीमा भिंतुने ।
0 Comments:
Post a Comment