आ सरकारी ब्वनेकुथिइ हे गुणस्तरीय शिक्षा : जीवनराम श्रेष्ठं

प्रतिनिधि सभा सदस्य जीवनराम श्रेष्ठं सरकारी व सामुदायिक ब्वनेकुथिइ गुणस्तरीय शिक्षाया नितिं आ वइगु सरकारं न्हूगु शैलीं ज्या याइगु न्ह्यथनादिल । वय्कलं स्थानीयवासीं स्थानीय क्षेत्रया ब्वनेकुथिइ थः मस्तय्त पठन पाठन याकेगु अवस्था सिर्जना याय्मागु न्ह्यथनादिल ।


शुक्रबाः ताहचलय् जनप्रभात माविया न्हूगु भवन शिलान्यास यासें श्रेष्ठं गुणस्तरीय शिक्षा थःगु निर्वाचन प्रतिबद्धताय् तकं दुगु न्ह्यथनादिल । ‘सरकारया तःधंगु बजेट शिक्षाय् वनाच्वंगु दु तर गुणस्तरीय शिक्षाया नितिं थिकेगु प्राइभेट ब्वनेकुथिइ वनेमाःगु अवस्थाया अन्त्य याना सरकारी ब्वनेकुथिइ ब्वनेया नितिं धेंधेंबल्ला याय्मागु अवस्था ब्वलंकेगु जिमिगु कुतः दु ।’ वय्कलं न्ह्यथनादिल, ‘येँया ब्वनेकुथिइ खाली थाय् मदुगुलिं ब्वनामितय् समग्र विकासय् समस्या जुयाच्वंगुलिं उखेपाखे नं बिचा याय्गु जुइ ।’

नेपाल ओलम्पिक कमिटीया नायः तकं जुयादिम्ह श्रेष्ठं ब्वनेकुथि नापं कासायात नं स्वाकेमागु न्ह्यथनादिल । उगु भवन शिक्षा मन्त्रालय अन्तर्गत जिल्ला आयोजना कार्यान्वयन इकाइपाखें कुल ६४ लाख बजेटय् निर्माण जुइत्यंगु कामपा वडा नं १३ या दुजः रामबाबु कोइरालां न्ह्यथनादिल ।  ब्वनेकुथि भवन २०७५ असार मसान्ततक पुवंकेगु तयारी जुगु ब्वनेकुथिया प्रध्यापक सतेन्द्र कर्णं न्ह्यथनादिल ।

ब्वनेकुथिया थःगु १६ रोपनी जग्गाय् हे ब्वनेकुथिया न्हुगु ब्लक तनेत्यनागु कर्णं न्ह्यथनादिल । शिलान्यास ज्याझ्वलय् जिल्ला आयोजना कार्यन्वयन इकाइ प्रमुख गणेश प्रसाद ढकाल, जनप्रभात मा.बि व्यवस्थापन समितिया नायः रामशरण डंगोल नापंया ब्वति दुगु खः ।

Share on Google Plus

News: Newa News

    छ्याता
    फेसबुक छ्याता

0 comments:

Post a Comment