ने.सं ११३७ थिंलाथ्व पारु, २०७३ मङ्सिर १४
प्रमूख प्रतिपक्षी दल नेकपा एमालें सरकारं न्ह्यच्युगु संविधान संशोधनया प्रस्तावया विरोधय् बिहीबाःनिसें जुइगु व्यवस्थापिका संसद्या मूँज्या अवरुद्ध यायेगु निर्णय यागु दु ।
संसद् भवन बानेश्वरय् थौं क्वचागु संसदीय दलया मूँज्याय् संविधान संशोधनया प्रस्तावं देःयात विखण्डित याकेगु व संविधान कार्यान्वयनय् जटिलता वइगु जुगुलिं पार्टीं सदन व सतकय् प्रतिरोध यायेगु निर्णय यागु उगु दलया मू सचेतक भानुभक्त ढकालं न्हयथनादिल ।
संसदया मूँज्या न्ह्याय् १५ मिनेट न्ह्यः थः सांसदतयेत अनिवार्य उपस्थितिया नितिं नं उजँ ब्युगु दु । पार्टीया नायः केपी शर्मा ओलीया अस्वस्थ्यताया हुनिं उपनेता सुवास नेम्वाङया नायःसुइ संसदीय दलया मूँज्या च्वंगु खः ।
थ्व दथुइ नेपाल मजदुर किसान पार्टीं संसदय् दर्ता जुगु संविधान संशोधनया प्रस्तावया विरोध यासें प्रस्तावया विपक्षय् दनेत फुक्क राजनीतिक दलयात इनाप यागु दु । नेमकिपाया नायः नारायणमान बिजुक्छेया नायसुइ थौं च्वंगु केन्द्रीय सचिवालयया मूँज्यां संशोधन प्रस्तावय् उल्लेखित भाषा, प्रदेशया सीमाङ्कनय् हिलाबुला, नागरिकता व जनसङ्ख्याया आधारय् राष्ट्रिय सभाय् प्रतिनिधित्व थेँज्यागु छुँ नं खँ नेपाः व नेपामी जनताया हितय् मदुगु ठहर यागु पार्टीया छ्याँजे सुनिल प्रजापतिं जारी विज्ञप्तिइ न्हयथनातगु दु ।विज्ञप्तिइ न्ह्यथनातःगु दु – प्रधानमन्त्री पुष्पकमल दाहालं भारतया उजँलय् सरकारं संविधान संशोधन प्रस्ताव दर्ता यागु दु । संविधान कार्यानवयनया नितिं स्थानिय, प्रदेश व प्रतिनिधि सभाया निर्वाचन यायेमागु इलय् भारतीय शासक वर्गया उजँ कथं संविधान संशोधन प्रस्ताव दर्ता यायेगु देसय् निर्वाचन जुइ मबीगु षड्यन्त्र जुगु ठहर मूँज्यां यागु विज्ञप्तिइ न्हयथनातःगु दु ।
0 Comments:
Post a Comment