1137 थिंलाथ्व तृतीया, मंसीर १७, २०७३, यल।
कलाकार परिषदं वरिष्ठ कलाकार रत्न बेहोशीया हनाये वरिष्ठ कलाकार मदनकृष्ण श्रेष्ठया मू पाहाँसुइ ज्याझ्वया ग्वसाग्वेत्यंगु थौं पत्रकार सम्मेलन याना न्ह्यथंगु दु ।
नेवाः पत्रकार राष्ट्रिय दबू यल कचां संयोजन याःगु उगु सम्मलेनय् ज्याझ्व: निगु ब्वेय् न्ह्यब्वइगु न्ह्यथन ।
न्हापांगु ब्वे वरिष्ठ कलाकार रत्न बेहोशीया लोकंह्वागु म्येत 'कायमचा ल्याय्म्ह, राजमहलया न्हृयाइपु बजारय् लगायतया थी थी म्ये लोकंह्वापिं युवा गायकतेयसँ न्ह्यब्वइगु न्ह्यथंगु दु । थुकिया लागि कलाकार भूपेन्द्र बज्राचार्यं उगु म्येया संगीत संयोजन यानादिगु दु । वयां लिपा दोसल्ला न्ययेका, तपुलिं पुईका, हना पौ नापं नगद अर्पण याना सम्मान याइगु ज्याझ्व: दु । सम्मानित ब्यक्तित्व रत्न बेहोशी बज्राचार्यया अभिब्यक्तिनापं हना ज्याझ्व: क्वचाई ।
निगूगु ब्वय् लोकप्रिय वरिष्ठ कलाकार अमरराज शर्मा, स्वयम्भूराज शाक्य, लोकप्रिय कलाकारपिं निशा देसार, सानुबाबु महर्जन, नाट्य नापं संकिपा लागाया लोकंह्वापिं कलाकार कृष्णभक्त महर्जन, आराध्यलक्ष्मी खड्गीपिन्सं म्ये, प्याखं न्ह्यब्वये धुंका लोकंह्वाम्ह ब्यक्तित्व राजेशमान सिँहया लेखन नापं निर्देशनय् ख्यालः (हास्य ब्यङ्ग नाट्य प्रस्तुति) न्ह्यब्वइ ।
नृत्य लागाया लोकप्रिय गुरुपिं मोहन ब्यञ्जनकार व संजय शर्मा राजोपाध्यायया नृत्य सृजना नं न्ह्यब्वइगु ज्याझ्व: दु । वाद्यवादकपिं इश्वर जोशी, मिलेश तण्डुकार, मिलन तण्डुकारं लोकप्रिय वाद्यवादन प्रस्तुत न्ह्यब्वइ ।
२०७३ साल पुष २ गते शनिबा: अग्नी पार्टी प्यालेस, कुमारीपाटीइ न्हिनय् ३ ता इलय् न्ह्याइगु ज्याझ्व: सुराजबीर बज्राचार्यं न्ह्याकादी। प्रिति भ्वे व Snack या ब्यवस्था दुगु ज्याझ्व:या टिकट मू रु १००० (द्वछि तका) जक तायतगु दु ।
0 Comments:
Post a Comment