येँ महानगरपालिकां थौंनिसें भवन नक्सा स्वीकृति प्रक्रिया अनलाइन प्रणालीपाखें न्ह्याकुगु दु ।
थ्व न्ह्यः नक्सा स्वीकृति फाराम जायेकेत ज्याकु वनेमागु, हार्ड कपी लःल्हायेमाःगु अवस्था दूगु खः । नागरिकयात सहज यायेत न्हापा यानावयाच्वंगु शैली दिका अनलाइन प्रणालीं उगु सेवा थौंनिसें न्ह्याकेत्यंगु येँमपाया सूचना अधिकारी वसन्त आचार्यं न्ह्यथनादिल ।
उगु ज्याया नितिं इलेक्ट्रोनिक बिल्डिङ परमिट सिस्टम (इबिपिएस) प्रणाली अद्यावधिक जूगु दु । थ्व प्रणाली भवन नक्सा पास यायेगु ज्या यात व्यवस्थित याइगु अनलाइन प्रणाली खः । उगु प्रणालीं हे नक्सा स्वीकृति जुइगु येँमपां न्ह्यथंगु दु ।
नक्सा पास यायेत, नामसारी यायेत व निर्माण सम्पन्न प्रमाणपत्र कायेत अनलाइनय् तयागु कागजपत्रया फाइल ज्वना न्हापा ज्याकु वनेमा । विसं २०७० भदौ १६ गतेनिसें येँमपां भ्वँ नं ज्वनेमाःगु कथं अनलाइन प्रणाली सञ्चालन याःगु खः । फाइलय् दूगु भ्वँ व प्रणाली स्वया प्रक्रिया न्ह्याः वनि ।
अनलाइन प्रणालीयात विकास यासें विद्युतीय हस्ताक्षर, अनलाइन राजस्व दुतिनेगु, उजुरीनापं भ्वँ म्वायेक सेवा बीगु कथं हिलागु सूचना अधिकारी आचार्यं न्ह्यथनादिल । थ्व प्रणाली थें सेवाग्राहीया ल्हातय् सेवा बीगु, गन खः अन हे सेवा बीगु एकीकृत विद्युतीय सुशासन प्रणालीया व्यवस्था जूगु येँमपाया धापु दु ।
भवनया नक्सा पास प्रक्रियाया अपूगु व पारदर्शी यायेत विद्युतीय भवन अनुमति प्रणाली (इलेक्ट्रोनिक बिल्डिङ परमिट सिस्टम–इबिपिएस) यात थप प्रभावकारी देकेत माःगु यायेत्यंगु दु । डिजिटल सिग्नेचरयात वैगु दिंनिसें कार्यान्वयनय् हयेत्यंगु दु ।
थ्व न्ह्यः वैशाख १ गतेनिसें न्याद्व वर्गफिटतक क्षेत्रफल दूगु छेँया नक्सा स्वीकृत यायेगु अधिकार वडायात बीधुंकुगु दु ।
0 Comments:
Post a Comment