१६ क्वःगु गणतन्त्र दिवस देन्यंकं थीथी ज्याझ्वः ग्वसाग्वया न्यायेकुगु दु । नेपामी जनताया ताःईया बलिदान व सङ्घर्षया उपलब्धि कथं थूगु दिवस न्यायेका वयाच्वंगु दु ।
राष्ट्रपति रामचन्द्र पौडेलया ब्वतिइ येँया तिंख्यःया सैनिक मञ्चय् गणतन्त्र मूल समारोह समितिं थौं सुथः विशेष ज्याझ्वः ग्वसाग्वया गणतन्त्र दिवस भव्यरुपं न्यायेकुगु दु ।
उगु दिवसया झ्वलय् राष्ट्रपति, उपराष्ट्रपति, प्रधानमन्त्री, सभामुख, राष्ट्रियसभा अध्यक्षनापं थीथी राजनीतिक दलया प्रमुखं गणतन्त्र दिवसया लसताय् दे दुने व पिने दुपिं सकल नेपामी तताकेहेँ व दाजुकिजायात भिंतुवा व लसहना ब्यूगु दु । वयेकपिंस गणतन्त्र थापनायायेगु आन्दोलनय् जीवन उत्सर्ग याःपिं सहिदप्रति भावपूर्ण श्रद्धाञ्जलि तकं प्वंकुगु दु ।
उबलय् न्हेगु राजनीतिक दल व नेकपा (माओवादी) नाप जूगु सहमतिकथं विसं २०६४ चैत २८ गते ऐतिहासिक संविधानसभाया निर्वाचन जूगु खः । विसं २०६५ जेठ १५ गते संविधानसभाया न्हापांगु मुँज्यां निस व ४० दँनिसेंया शाहवंशीय राजतन्त्र क्वचायेकुसें गणतन्त्र घोषणा याःगु खः ।
गणतन्त्रयात छगु शासन प्रणालीजक मजुसे सभ्यता, तजिलजि व सामाजिक जीवन पद्धतिया रूपय् कयावयाच्वंगु दु । सरकार प्रमुख नापं राजनीतिक दलया नेतातयेसं लोकतान्त्रिक गणतन्त्रया बांलागु प्रणालीयात बल्लाकेत गरिबी व लिचिलेगु स्वभाव विरुद्धया ल्वापु त्याकेत न्ह्याः वने फयेमा धका सकल नेपामियात आह्वानतकं याःगु दु ।
0 Comments:
Post a Comment