दशगजा खाली यायेत नेपाल–भारतया सीमावर्ती प्रशासकत सहमत


भारतनाप सीमा स्वाःगु झापा व मोरङ जिल्लाया दशगजा लागायात खाली याकेत व क्वःदःगु सीमास्तम्भत मर्मतसम्भार यायेत निगुलिं देया सीमावर्ती जिल्लाया प्रशासकत सहमत जूगु दु ।

नेपाल–भारत सीमावर्ती जिल्ला समन्वय समिति (बिडिसिसी)या भारतया किसनगञ्जय् क्वचाःगु मुज्याय् दशगजा लागाय् जूगु बुँज्या व छेँटहरा चीकेगु सहमति जूगु खः ।

मुँज्याय् नेपाली पुचःया नेतृत्व मोरङया प्रमुख जिल्ला अधिकारी वीरेन्द्रकुमार यादव व भारतीय पुचःया नेतृत्व विहार प्रान्तया किसनगञ्ज जिल्लाया मजिस्ट्रेट श्रीकान्त शास्त्रीं याःगु खः ।

अतिक्रमण नापं खुसिं चुइकुगु, त्वपुगु व तंगु सीमास्तम्भ माला यथास्थानय् पुनःस्थापना यायेगु तकं सहमति जूगु दु । अथेहे मुँज्याय् निगुलिं देया सीमा लागाया अधिकारीदथुइ १४ गु विषयलय् सौहार्दरूपं सहलह जूगु खः । किसि आतङ्क, लागूवासःया कारोबार, मानव तस्करी, चोरी निकासी नियन्त्रण नापंया महत्वपूर्ण विषयलय् भारतीय पक्षनाप नेपाःपाखें इनाप तःगु खः ।

मुँज्याय् भारतीय पक्षं सीमा लागाय् जुइफइगु आतङ्ककारी गतिविधि, हतियार तस्करी, नक्कली नोट, मदिरा व गाईवस्तु तस्करीनापंया समस्याया समाधानया लागि नेपाली पक्षया ध्यानाकर्षण याःगु खः । सीमा लागाय् सवारी साधनया नियमित चेकजाँच, अपराधी ज्वनेत सुचं आदानप्रदान यायेगु विषयलय् तकं मुँज्याय् सहलह जूगु खः ।

मुँज्याय् नेपाली पक्षपाखें झापाया सहायक प्रमुख जिल्ला अधिकारी विश्वराज नेपाल, मोरङया सहायक प्रजिअ शरदकुमार पोखरेल, सशस्त्र प्रहरी बलया २ नं गणया गणपति देवराज अर्याल, झापाया प्रहरी उपरीक्षक रेग्मी, मोरङया प्रहरी उपरीक्षक दीपक पोखरेलनापंया ब्वति दूगु खः ।

भारतीय पक्षपाखें मुँज्याय् किसनगञ्जया सहायक डिस्ट्रिक्ट मेजिस्ट्रेट एके गुप्ता, एसएसबीया ४१औँ बटालियन कमान्डर एससी नागी, १९औँ बटालियन कमान्डर मधुकर अमिताभ, अररियाया वन विभागया अधिकारी नरेश प्रसादनापंया ब्वति दूगु खः ।

भारतनाप झापाया सछि व १८ गु किलोमिटर व मोरङया ५३ किलोमिटर सीमा क्षेत्र लाः ।


Share on Google Plus

News: Newa News

    छ्याता
    फेसबुक छ्याता

0 Comments:

Post a Comment