स्वन्तिया निन्हुया दि‌ं खिचा पुजा, स्वन्तिया विवाद यथावत, येँया नापं छुंछुं लागाया नेवा: बाहेक लक्ष्मी पुजा नं थौं हे

  


नेपामिपिनिगु निगुगु तःधंगु नखः स्वन्ति म्हिग निसें न्ह्यात । म्हिग छन्हु सकल नेपामिया स्वन्ति नापं हँसां थौं बहनी निसें धाःसा थाय् स्वया स्वन्ति पाय् त्यंगु दु ।

म्हिग क्वःयात पूजा याना न्हापांगु दिं क्वचाल । थुगुसि यमपञ्चक कात्तिक २७ गतेनिसें न्ह्याःगु दु । तर क्वःपुजा २८ गते लाःगु दु । अथेहे धनवन्तरि जयन्ती, धन त्रयोदशी व धनतेरस पर्व नं उगु हे दिं लाःगु दु । तिथि घटबढया कारणं थथे जूगु नेपाल पञ्चाङ्ग निर्णायक समितिं न्ह्यथंगु दु ।  

अथेहे कात्तिक २९ गते थौं सुथः नरक स्नान नापं खिचा पुजा क्वचा:गु दु । 

थौं १ः४९ बजेतक चतुर्दशी व वयाँलिपा औंसी तिथि जूगु जाेशीपिनिगु धाःपु दु । थ्व हे जुया येँ व थीथी थाय् या नेवाःत बाहेक नेपाःया दक्वस्याँ २९ गते औंसी तिथि लाका लक्ष्मीपूजा यायेत्यंगु दु । तर औंसी तिथिइ यायेमाःगु स्नान व दान धाःसा कन्हे कात्तिक ३० गते सुथः यायेमाःगु धाःगु दु । 

येँय् ३० गते जक लक्ष्मी पुजा यायेत्यंगु दु । तर येँ बाहेक धाःसा सा, द्वँ व म्हपूजा ३० गते यायेत्यंगु दु । आइतबाः सुथः ११ः२७ बजेतक जक औंसी तिथि लाः । वयाँलिपा प्रतिपदा न्ह्याइगुलिं म्हपूजा यायेत्यंगु खः । अथेहे मंसिर १ गते सोमबाः किजापुजा न्यायेकेत्यंगु दु । सुथः ११ः३७ बजे किजापुजाया साइत जूगु न्ह्यथंगु दु । 

येँ धाःसा छसिकथं १ गते म्हपुजा व २ गते किजापुजा यायेत्यंगु दु ।

मंसिर १ गते नेपाल संवतया न्हूदँ धाःसा सकस्याँ मंका कथं हे हनेत्यंगु दु । प्रतिपदाया दिं सुर्द्य लूगु दिं न्हूदँ न्यायेकेमाःगु शास्त्रीय वचनकथं न्हूदँ हनेत्यंगु खः ।

मंसिर २ गते सुथः ७ः०४ बजेतक द्वितीया तिथि लाः । येँय् थ्व कुन्हु किजापुजा यायेत्यंगु दु । सरकारं मंसिर २ गते  देन्यंकं सार्वजनिक बिदा बियातःगु दु ।

Share on Google Plus

News: Newa News

    छ्याता
    फेसबुक छ्याता