येँ , कार्तिक २७, बिहिबार
नेपाल ओलम्पिक कमिटीया ११ क्वःगु वार्षिक साधारण सभा क्वचाःगु दु । कोभिड—१९ महामारीया हुनिं भर्चुअल सभा याना क्वचायेकुगु खः ।
नेपाल ओलम्पिक कमिटीया मूछ्याञ्जे निलेन्द्र राज श्रेष्ठं साधारण सभाया मू पाहाँ माननीय युवा तथा खेलकुद मन्त्री जगत बहादुर विश्वकर्मा, राष्ट्रिय खेलकुद परिषदया सदस्य सचिव व ने.ओ.कया दक्व साधारण दुजः नापं पदाधिकारीपिं, ओलम्पियनपिं, पत्रकारपिंत लसकुस याःगु खः । साधारण सभाया न्हापांगु सत्रय् ओलम्यिनपिनि पाखें दिपक विष्ट, नेपाल खेलकुद पत्रकार मञ्चया नायः देबेन्द्र सुबेदी, ने.ओ.क.या सल्लाहकार पूर्व खेलकुद मन्त्री माननीय शरत सिंह भण्डारीं भिंतुना बियादिल । ने.ओ.क या पुलांम्ह नाय नापं मानार्थ नायः रुक्म शम्शेर राणां नेपाली खेलकुदया अभिलेखत संकलन यायेगु व संरक्षण यायेमाःगुलिइ जोड बियादिल । मानार्थ अध्यक्ष ध्रुब बहादुर प्रधानं वर्तमान परिस्थितिइ कासायात गुकथं न्ह्याकेगु धका छ्याता बियादिल । राष्ट्रिय खेलकुद परिषदया सदस्य सचिव रमेश सिलवालं आःया अवस्थाय् नेपाल सरकारया प्रोटोकलयात ध्यानय् तया कासा न्ह्याकेगु न्ह्यथनादिल । सभाया मूपाहाँ युवा तथा खेलकुद मन्त्री विश्वकर्मां नेपाल ओलम्पिक कमिटीं यानाच्वंगु ज्या व कोभिडया महामारीइ तकं ने.ओ.क. या थीथी अनलाइन तालिम व प्रशिक्षण संचालन याःगु ज्याया प्रशंसा यानादिल । थज्याःगु महामारीइ तकं नेपाल ओलम्पिक कमिटीं थःगु साधारण सभा ग्वसाःग्वःगुलिं भिंतुना देछानादिल ।
न्हापांगु सत्रया अन्तय् सभा नायः नापं नेपाल ओलम्पिक कमिटीया नायः प्रतिनिधि सभा सांसद जिवन राम श्रेष्ठं कोभिड —१९ या महामारीया हुनिं टोकियो २०२० ओलम्पिक फ्यानातःगु इलं दछि लिज्याःगुलिं सन् २०२१ जुलाई २३ निसें अगष्ट ८ तक जुइगु न्ह्यथनादिल ।
सभाया निगुगु सत्रय् ने.ओ.क. या मूछ्याञ्जे श्रेष्ठं सन् २०१९/२०२० या नेपाल ओलम्पिक कमिटीया गतिविधिया प्रतिवेदन न्ह्यब्वयादिल । आर्थिक नियमावली व कर्मचारी नियमवाली सर्वसम्मतं पारित जूगु खः । नापं ने.ओ.क.या आर्थिक वर्ष २०७६/७७ या आर्थिक प्रतिवेदन व सन् २०२१ या अनुमानित बजेट तकं सर्वसम्मतं पारित जूगु खः । लिपांगु इलय् ने.ओ.क.या मेगु वार्षिक साधारण सभा २०७८ कार्तिक १९ व २० य् यायेगु क्वछ्यूगु दु ।
0 Comments:
Post a Comment