आराध्या लक्ष्मी खड्गी नेपालभाषा संकिपा ख्यलय् थौंकन्हे चर्चाय् दुम्ह कलाकार जक मखु दकलय् ब्यस्त व सकृय जुयादि । स्वन्तिया इलय् तकं थीथी म्येय् अभिनय याना ब्याक टु ब्याक म्यूजिक भिडियो पिहाँ वयाच्वंगु दु । तर कलाकारिता जक मखु वयेकः थौंकन्हे कोरियोग्राफि नापं निर्देशन तकं यानादी ।
म्यूजिक भिडियोया सुपरस्टार रुपेन्द्र श्रेष्ठ नाप ज्वःलाका नकतिनि हे जक यचुगु भ्वतय् म्ये च्वया बोलया म्ये पितब्यूगु दु । अथेहे रुपेन्द्र नाप हे ज्वःलाका जमाना मभिं स्व छुं वा न्ह्यः वःगु खः ।
नेवाः न्यूजनाप आराध्या लक्ष्मीं थःगु निर्देशन यात्रा व निर्देशन याःगु म्यूजिक भिडियो जमाना मभिं स्व या विषयलय् खँल्हाबल्हा याःगु दु । जमाना मभिं स्व म्ये राबिन्सन कंसाकार व सुमन मानन्धरया सलय् थ्वःगु दुसा सुरज वीर बज्राचार्यया च्वसा व जुगल डंगोलया संगीत दु । थुकि छाँयांकन, सम्पादन वरिष्ठ सम्पादक सोहन मानन्धरया दुसा परिकल्पना, कोरियाग्राफि नापं निर्देशन आराध्या लक्ष्मी खड्गीयागु दु ।
थ्व हे परिकल्पनाया विषयलय् वयेकलं थुकथं धयादि :
म्येया खँग्व कथं हे कन्सेप्ट तयार जूगु ख: । सचेत जुया जुइमाःगु सन्देश थूगु म्ये बियागु दु । छम्ह मिजँ नं थःम्हँ ययेकाम्ह मिसायात जमाना मभिंगु व होस याना जुइत सल्लाह ब्यू ब्यूं थःगु मतिना तकं प्वंकुगु म्येया खँग्वयात न्ह्यइपुगु तरिका प्रस्तुत यायेगु कोसिस यानागु खः । मिजँया मतिनाया खँ न्यना छेँ धायेकः वःसा म्हाः धाये मखु धका स्वीकृति ब्यूगु तकं क्यंगु दुसा माया प्रितिया खँ जक ल्हाना मिजँ तयेसं झंग लाइगु खँ तकं खँग्वलय् दु । मिजँ नं मिसायात हयेकुगु व अन्तिमय् व्यवहारिक देके कथं इमिगु मतिना सफल जूगु व ब्याहा जूगु क्यनागु दु । थुकि बाँलागु हसना वनेफु धका हे थज्यागु कन्सेप्ट तयागु खः । कन्सेप्ट न्यंका म्ये च्वमि सुरज दाइयात सुरु व अन्तय् डाइलग नं च्वकागु खः । सकस्यां ययेकादिल ।
म्यूजिक भिडियोलय् थुकथं डाइलग तया संकिपा थें देकुगु अपायेसकं खनेमदु नेपालभाषा ख्यलय् । थुकि छु धयादि ?
म्यूजिक भिडियो भचा भचा पाये हे माः । नेपाली म्ये स्वयेबलय् डाइलगत दूगु झीसँ खना । थुकि नं छगु कुतः यानागु दु । बाखनं फ्वंगु थें तायेका । हिसि दुम्ह मयेजु धका मिसाया ल्यू ल्यू जुइगु स्वयाँ बाखँ दयेका मिसाया ल्यू छाय् वन ले धका क्यनागु खः । जि थः नं टिकटक दयेका च्वनाम्ह नापं थौं कन्हे टिकटकया ट्रेन्ड जूगुलिं लँय् थ: य:थे टिकटक दयेके बलय् जुइफुगु दुर्घटनाया विषयलय् थ्व म्यूजिक भिडियो देकागु खः । फुक्कस्या जिवनय् हिरो वयाः बचे याइ मखु । सुनसान थासय् वना याकबुक चुलबुल जुइमज्यू । जमाना मभिं स्व ।
टिकटकला दयेकादिल तर मोबाइलला अफ हे खनेदु धैगु न्ह्यसलय् :
धाथें टिकटक दयेकागु खः तर निभालं याना मोबाइल हाकुक वल । टिकटक पोष्ट नं यानागु दु । मखुसा थन स्वयादिसँ ।
@aaradhyalaxmikhadgi ♬ original sound - Sandeep Adhikari
कलाकारपाखें निर्देशनया यात्राया बारे न्यनागु न्ह्यसलय् :
दकलय् न्हापा खस नेपाली म्ये कलाकार कथं ज्या यानागु खः । अञ्जु पन्तया म्ये यानागु खः । वयाँ लिपा स्टेज ज्याझ्वःत याना । अनंलि नेपालभाषाया म्युजिक भिडियो यानागु खः । निगुगु म्युजिक भिडियो निसें हे कोरियोग्राफि यानागु खः । डान्स टिचर तकं जुयागुलिं याये अपुल । वयाँ लिपा मेपिंत नं कोरियोग्राफि स्यनाबिया । लिबाय् धुंका संकिपाया म्ये जिं हे निर्देशन यायेगु ह्वःता संकिपाया निर्देशक नापं जिमि गुरु राजेशमान सिंहं बियादिल । रवि डंगोल नापया म्यूजिक भिडियोयात नं जिं निर्देशन याये खन । उकि नं डाइलग तयागु दु । उगु म्ये बाँलाःसा छुं ई लिपा जक लिकायेगु धका तयातःगु दु । न्हापांनिसें निर्देशनय् मन क्वसाःम्ह खः जि ।
लिपांगु इलय् भविष्यया छु बिचा दु ?
आःयात म्यूजिक भिडियो हे यानाच्वनागु दु । बाँलाम्ह निर्देशन, कोरियोग्राफर नापं कलाकार हे जुयाच्वने । भविष्यय् डान्स सेन्टर चायेकेगु बिचा दु । स्वय् छु जुइ ।
0 Comments:
Post a Comment