विदेशी च्यानल वितरक मल्टी सिस्टम अपरेटर (एमएसओ) तयेसं भारतीय न्युज च्यानलया प्रसारण नेपालय् बन्द याःगु दु ।
च्यानल वितरकतयेसं बिहीबाः सनिलनिसें दूरदर्शनबाहेक फुक्क भारतीय न्युज च्यानलया प्रसारण बन्द याःगु दु । भारतीय टिभी च्यानलतयेसँ नेपाःया बारे अतिरन्जित व अनर्गल प्रचार याःगु व लिपांगु खुसि प्रधानमन्त्री व चिनिया राजदूतया नां स्वाना आपत्तिजनक विषय प्रसारण यायेधुंका च्यानलत नेपालय् खनेमदैगु याःगु खः ।
सरकारं क्लिन फिड तयेन्ह्यः हे इन्टरनेटं अनाधिकृत रुपं वैगु भिडियो कन्टेन्टत पनेत एमएसओतयेसँ इनाप याःगु दु ।
डिसहोम,मेगा म्याक्स, डिएसएन, मेरो टिभीलगायतया अपरेटरतयेसं मंका कथं भारतीय न्युज च्यानलया प्रसारण बन्द याःगु खः ।
थुखे सञ्चार तथा सूचना प्रविधि मन्त्रालयं भारतीय न्यूज च्यानलया प्रशारण दिकेगु निर्णयबारे मन्त्रालययात जानकारी मदुगु न्ह्यथंगु दु ।
मन्त्रालयं धाःसा सुयातं भारतीय न्यूज च्यानलया प्रशारण पनेत उजँ मबियागु न्ह्यथंगु दु ।
बिहीबाः पत्रकार सम्मेलनय् सञ्चारमन्त्री डा युवराज खतिवडां भारतीय सञ्चार माध्यमय् प्रधानमन्त्री व नेपाःयात स्वाका वयाच्वंगु विषयवस्तु प्रति सरकारया ध्यानाकर्षण जूगु न्ह्यथंगु खः ।
राष्ट्रियता, राष्ट्रिय स्वाधीनता व राष्ट्रहितय् आँच वैगु छुं नं सामग्री प्रकाशन व प्रशारण मयायेत इनाप यासें भारतीय मिडियाय् खनेदूगु लिपांगु प्रवृतिया लागि राजनीतिक व कानूनी उपचार मालेगु न्ह्यथंगु खः ।
उगु सामग्रीयात कया प्रेस काउन्सिल व नेपाल पत्रकार महासंघं कडा आपत्ति प्वंके धुंकुगु दु ।
छ्याता
फेसबुक छ्याता