२६ जेठ, स्वास्थ्य तथा जनसंख्या मन्त्रालयया स्वास्थ्य आपतकालीन कार्यसञ्चालन केन्द्रया प्रमुख डा. गुणराज लोहनीं २१ जेठय् फुक्क कोभिड अस्पतालयात पौ च्वया कोरोना परीक्षणया न्हूगु गाइडलाइन ब्यूगु दु । थ्व कथं पोजेटिभ केसत लक्षण मदयेवं स्वन्हु वा १४ न्हु आइसोलेसनय् तयेधुंका टेष्ट मयाःसें डिस्चार्ज यायेत उजँ बियातःगु दु ।
थ्व हे जुया दाङया बेलझुण्डीया कोरोना विशेष अस्पतालया आइसोलेसनय् च्वंपिं १० म्ह आइतबाः डिस्चार्ज जुल । कोरोना भाइरस (कोभिड–१९) संक्रमण पुष्टि जुइधुंका अस्पतालया आइसोलेसन वार्डय् भर्ना जूपिं बाँकेया न्याम्ह, दाङया निम्ह, कपिलवस्तुया निम्ह व बर्दियाया छम्ह याना १० म्ह छेँ वन ।
१४ न्हु आइसोलेसनय् च्वंपिं इपिं मध्य ५ म्हसिया पीसीआर विधिं कोरोना संक्रमण परीक्षण याना रिपोर्ट नेगेटिभ वःगु खः । तर ल्यँ दुपिं ५ म्हसिया धाःसा परीक्षण हे मयाःसे लक्षण मदुगुलिं डिस्चार्ज याःगु खः । इपिं संक्रमित हे खः वा मखु धैगु मसीकं लक्षण मदुगु आधारय् डिस्चार्ज जूगु खः ।
थ्व न्ह्यः शुक्रबाः नं धनगढीया सेती प्रादेशिक अस्पतालया आइसोलेसनय् ६ म्हेसित पीसीआर विधिं परीक्षण हे मयाःसे डिस्चार्ज याःगु खः ।
थ्व खँय् जनस्वास्थ्य विज्ञतयेसँ धाःसा लक्षण मदयेवं आइसोलेसनय् च्वंपित परीक्षण मयाःसे छेँ छ्वयेगु गलत जूगु न्ह्यथंगु दु । लक्षण मदयेवं डिस्चार्ज याःसा यक्व संक्रमित छेँ थ्यना मेपिंत नं संक्रमित यायेफैगु इमिगु ग्याः चिकु दु । हानं नेपालय् यक्व धैथें कोरोना संक्रमितया लक्षण हे खनेमदु । थ्व उजँ तच्वकं घातक जूगु विज्ञतय् धापु दु । सरकारया थ्व गलत निर्णयया कारणं भयावह अवस्था वैगु ग्याःचिकु दु ।
नेपालय् गुलि संक्रमित लछितक आइसोलसेनय् च्वंसां पोजेटिभ वयाच्वंगु दु । थ्व हे जुया २४ घौ दुने निक पीसीआर टेष्ट नेगेटिभ वःसा जक डिस्चार्ज यानाच्वंगु खःसा आः थ्व उजँ धुंका टेष्ट हे मयाःसे डिस्चार्ज यानाच्वंगु दु ।
छ्याता
फेसबुक छ्याता